Mañana miércoles entamen les movilizaciones del sector de la llimpieza pol desbloquéu del conveniu y la risible xubida salarial que se-yos propón

La medría interañal del IPC yera n’ochobre del 5’5%. Aplicando esi porcentaxe a un SMI de 965 euros, queda traducíu a 53 euros mensuales. Cualesquier importe perbaxo d’esa cifra implica perda de capacidá alquisitiva. A les emplegaes de llimpieza ta pidiéndose-yos que roblen un conveniu que-yos ufierta, esautamente, una centésima parte d’esa cifra, 0’53 € al mes, esto ye, práuticamente res.

Poro, los sindicatos del seutor anunciaron yá un calendariu de movilizaciones pa  denunciar la «inaceutable» propuesta de les patronales de xubir los salarios un total de 6,41 euros al añu.

Nun comunicáu conxuntu espublizáu esti llunes calificaron d’«insultu» esta xubida salarial que consideren «risible» y criticaron la intencional llentitú de les patronales a la de buscar alcuerdos pa desbloquiar un conveniu qu’entamó les sos negociaciones el pasáu mes de mayu y qu’afeuta a unos 12.000 trabayadores.

Tamién denuncien la postura de les alministraciones al axudicar les llicitaciones a les ufiertes económiques más baxes, «lo que contribúi a la costante precarización de salarios y condiciones llaborales».

Poro, los sindicatos convocaron una riestra de concentraciones énte delles sedes istitucionales y empresariales que van entamar el prósimu miércoles énte la Casa Conceyu de Xixón.

Xicu Llamazares