Los cambeos na plantiya y nes condiciones de trabayu deriven n’incumplimientos contractuales, perda de veceros, acidentes y sobrecarga llaboral

CSI denuncia la falacia de falta de produción que foi l’argumentu de la empresa EBHI -de titularidá semipública- pa poner en marcha en ERTE y l’ERE d’estinción de contratos, que supunxo’l despidu de 15 trabayadores fixos y 7 eventuales, amás del cambéu sustancial de les condiciones de trabayu impuestu de manera unillateral pola empresa.

A día de güei lleven descargaes 8.617.577 tonelaes, tando anunciaes otres 300.000 más no que queda de mes de payares, cuando la empresa tenía una previsión d’un másimu de 7,5 millones de tonelaes a final d’añu.
Precisamente esa “baxa productividá” foi l’argumentu remanáu p’afitar a mediaos de marzu del presente añu, de forma unillateral per parte de la dirección d’empresa d’estiba, un cambéu sustancial nes condiciones de trabayu, que traxo por aciu un ERE d’estinción de contratos una amenorgamientu drásticu del personal operativu, asina comu un amenorgamientu de 5 a 3 turnos de trabayu, polo que se suprimía nun principiu la operativa nos turnosde nueche. La plantiya operativa ta trabayando con esti nuevu sistema más hores qu’anantes, esfrutando de menos descansos y tando a dimposición n’un reten pa continuos cambeos de turnu.

La supresión teórica de la vez de nueche derivó, denuncien dende CSI, en que de fechu sí se trabaye nestes hores, pero frayando tanto los alcuerdos algamaos en febreru del 2017 nel SASEC, en materia de plantiya operativa con trabayos en buque, como los protocolos de seguridá internos de la empresa en dicha materia, fechos estos que se vienen denunciando reiteradamente n’inspeción de trabayu.

Frutu d’estos incumplimientos y deriváu de la falta de personal agravada polo que dende’l sindicatu denominen “nefasta programación dende la dirección d’operaciones” el pasáu día 27 d’ochobre, producióse un acidente na bodega Nº 2 del barcu “NAVIOS STELLAR”, por cayida d’un trabayador a distintu nivel, tardándose mas d’una hora en poder atender al acidentáu.

Amás del perxuiciu pa los trabayadores tamién se fixo patente’l maltar de los veceros, tanto’l principal, Arcelor, como los denominaos terceros, polos retrasos siguíos na prestación del serviciu de descarga.

Llucía F. Marqués

This work is licensed under a Creative Commons Attribution 4.0 International License.