Andecha Astur entama una xornada na que representantes de dellos coleutivos asturianos falarán de les alternatives frente a la precariedá y la esclusión que carez el Pueblu Asturianu; darréu l’alderique, tendrá llugar una intervención del diputáu d’EH Bildu,  Oskar Matute

El prósimu sábadu 13 payares, de magar les 11 la mañá tendrá llugar nel Hotel Begoña de Xixón una xornada na que baxo l’entítulu de “¡Dami Tira!, Solidaridá y Socialismu n’Asturies d’anguañu” analizaráse la llaceriosa situación na que s’afaya bona parte de la población asturiana, “a la gueta d’alternatives válides ellaboraes de magar los principios universales de la solidaridá y el socialismu”.

La xornada, que ye abierta al públicu, entamará con una mesa-alderique que moderará Mariu Arbesú y na que participarán Lola Villacob, Asociación Pueblu y Dignidá y CSI, el Profesor d’Estructura Económica na U. Autónoma Madrid, David Rivas, Juan Manuel M. Morala en representación de la Corriente Sindical d’Izquierda, Boni Ortiz, d’Anticapitalistes Asturies y Llucía Fernández, en representación d’Andecha Astur.

La formación nacionaliega destaca na so convocatoria delles cifres que recueyen la murnia situación anguañu de la población asturiana, con una tasa de probitú del 27 % ya’l mayor porcentaxe de mocedá en paru d’Europa, un 35,7 %, lliderando Asturies l’índiz estatal de desigualdá social. Remembren tamién que’l 89,9% de les contrataciones son temporales ya’l 40% a tiempu parcial, que nel 10% de los llares asturianos naide nun tien trabayu y  que, comu consecuencia de tolo anterior, Asturies pierde 36 moraores diarios.

Darréu la mesa-alderique, tendrá llugar la intervención del diputáu d’EH Bildu, Oskar Matute, tres la que s’abrirá un turnu pallabres.

Nuria Prendes

This work is licensed under a Creative Commons Attribution 4.0 International License.