El xuráu decidió conceder el premiu a La reina de la guapura de Leenane por ser «un apueste pol teatru contemporaneu». Nel acta del gallardón, los miembros del xuráu destaquen que la obra «relluma en tolos aspectos: repartu, direición, puesta n’escena, testu y torna, y que nos enfrenta con una problemática irlandesa d’emigración, conflictu llingüísticu y d’identidá que s’afaya mui bien a la nuestra tierra».

La reina de la guapura de Leenane, del autor irlandés Martin McDonagh y tornada al asturianu por Antón Caamaño, impúnxose a los otros trés espectáculos  finalistes del V Festival Nel Amaro y que se representaron a lo llargo d’esti mes d’ochobre nel Teatru Filármonica d’Uviéu: Grana de cardamomu, d’El Callejón del Gato, Les piripirates con parches y a lo xole, de Factoría Norte, y Setiembre, d’Arte Producciones.

El xuráu encargáu de valorar les obres finalistes, que se reunió baxo la presidencia d’Antón García, director xeneral de Política Llingüística, tuvo integráu por María Cotiello, actriz y filóloga; Pilar  Fernández, escritora y filóloga; Mar Friera, filóloga y profesora; Chechu García, escritor y profesor; y Eva Vallines, actriz y crítica teatral. Actuó como secretaria Laura Marcos, filóloga adscrita a la Dirección Xeneral de Política Llingüística.

Nun Tris, fundada en 1992 como compañía amateur y profesional dende 1997, ye una de les compañíes más versátiles y veteranes del panorama teatral n’Asturies, con más de 54 espectáculos de toa mena. Tamién ye una de les compañíes que más apuesta pol asturianu, yá que la metá d’estes propuestes, aproximao, tán nesta llingua. Primero d’esto foi finalista del Festival Nel Amaro n’otres dos ocasiones, con ¡Aire!,  y cola adaptación de la ópera de Mozart Los amorinos de Bastián y Bastiana.