El  XI Salón Internacional de les Sidres de Gala (SISGA) supera nesti eventu sidreru internacional el númberu de llagares participantes nes sos once ediciones, con más de 180 marques de sidre de llugares tan estremaos comu Perú, Letonia, Alemania o los EEXX, pente otros cerca de 30 países productores de sidre

Según informen, los organizadores del SISGA y los llagares participantes tuvieron d’enfrentase a les restriciones a la movilidá pol Covid-19, un escesu de xestiones alministratives aduaneres y los crónicos problemes de tresporte y comunicación que dificulten la entrada de mercancies n’Asturies. Tou ello nun torgó la iscripción masiva de llagares, que participen con más de 180 marques de sidre d’alrodiu trenta países, lo que, sigún declararon dende la revista LA SIDRA “espeya tantu la vitalidá del seutor a nivel nacional ya internacional, comu la ca vegada mayor reconocencia del SISGA como un referente sidreru internacional de primer orde, y del altísimu prestixu de los Premios SISGA“.

L’eventu entama cola cellebración de la Tastia Abierta al Públicu el vienres 1 d’ochobre n’horariu de 5 a 9 nel Restorán Amares.-NH Xixón. La tastia abierta, cancelá l’añu pasáu por mor del andanciu,  ye una de les xornaes clave del  Salón Internacional de les Sidres de Gala, y nella los llagareros participantes dan a conocer los sos productos al gran públicu.

El 2 d’ochobre, nel café Dindurra, cellebraránse un total d’ocho Tasties Guiaes polos propios llagareros, en sesiones de 30 menutos de duración. Participarán llagareros d’EEXX, el País Vascu, Francia, Chile y Asturies. La llimitación d’aforu fuercia a facer reserva previa de plaza, respetándose l’orde d’iscrición.

El Salón Internacional de les Sidres de Gala finará cola cellebración d’un Brunch de Gala demientres el que se fadrá entrega de los prestixosos Premios SISGA’21 LA SIDRA, que reconocen les meyores sidres presentaes nel Salón Internacional de les Sidres de Gala, siendo un referente internacional de calidá .

Los Premios SISGA reconocen catorce categoríes y cunten con un Xuráu Internacional, de reconocíu prestixu formáu por enólogos, llagareros y periodistes especializaos, presidíu pol espertu Manuel G. Busto; p’asegurar la imparcialidá del xuráu, ca llagareru participante propón un miembru del mesmu, siguiéndose un sistema de tastia a ciegues.

Redaición InfoAsturies

This work is licensed under a Creative Commons Attribution 4.0 International License.