• Portada
  • >
  • Cultura
  • >
  • Homenaxe a Valentín Fuente Álvarez, 45 años de gaiteru

Homenaxe a Valentín Fuente Álvarez, 45 años de gaiteru

  • 21 Setiembre, 2021
Les asociaciones Afatra y Amigos del Roble faen homenaxe del gaiteru sierense el prósimu sábadu 25 de setiembre a les 12 hores, nel Teatru Auditoriu de La Pola Sieru
Valentín Fuente Álvarez, estudiosu de les tradiciones, mayestru gaiteru y trabayador incansable’n defensa de la música’l país,  ñació en Perabeles, Santa Bárbola y ta afincáu va más de 25 años en La Pola Sieru.
Con namás 13 años entró a formar parte de la Sociedá de Festexos San Bartolomé de Santa Bárbola, averándose a los movimientos asociativos y culturales de la Cuenca’l Nalón. Pela mesma dómina entama a deprender a tocar la gaita de la man de Maximino García “El Gaiteru Carrocera”,  nun tiempu en qu’Asturies andaba escasa de músicos que se dedicaren esti istrumentu.
Bien ceo entama a investigar el repertoriu “de la vieya escuela” y a tocar pa dellos grupos folclóricos. Na mesma  llínia toca como gaiteru oficial en dellos concursos de canción asturiana, organiza festivales, toca’n folixes, fiestes de práu y eventos estremaos.
Defensor de la pareya de gaita y tambor (música del país) como elementu indivisible na tradición, Valentín ye, asinamesmo, un gran investigador de la cultura asturiana y conocedor de toles sos fiestes populares, imparte talleres de formación y cursos de gaita y tien gran cantidad d’artículos escritos en revistes especializaes. El so calter y la so gran humanidá siempre lu lleven a poner en valor a les figures escaecíes de la tradición, homenaxeando a toes eses persones que como él defiende “dexáronnos la tradición nes manes, pa que la curiemos con procuru. Esa ye la trasmisión oral”.
El so compromisu nel Conceyu de Sieru ye tamién bultable: collaborador del certame de Cancios de Chigre de La Pola dende la so primer edición, Director del Concursu de Canción Asturiana Conceyu de Sieru; collaborador de la Sociedad de Festexos de La Pola Sieru ya impulsor de les alboraes nos Güevos Pintos y El Carmín. Foi promotor del Concursu de Baille a lo Suelto, recuperador del Ramu pa la procesión del Carmen, el Festival d’Asturianía, recuperador de los Pasucais con Xigantes y Cabezudos y creador del sistema de votación popular nel Concursu de Pinchos, ente otres actividaes.
Dexa grabaes fasta la fecha una bayura de collaboraciones con intérpretes y agrupaciones folclóriques y un proyectu personal asoleyáu: Raices Nueses, un trabayu discográficu que guarda la esencia de la tradición y val como referencia pal estudiu de la gaita asturiana.
Por tol so importante llabor na conservación y espardimientu de la música y la cultura’l país, en Sieru faen-y esti homenaxe col que quieren agradece-y el so enfotu, poniendo de relieve la importancia de persones comu elli nel caltenimientu de la tradición de nueso.
Vitor Corte

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies