Nel 2018, 8 víes de peaxe fueron rescataes, la mayor parte pela redolada de Madrid y na exa Mediterránea. Col PSOE nel gobiernu, otros trés tramos remataron la so vixencia y nun fueron prorrogaos, pasando a ser de baldre. Güei dexen de ser de pagu otros cinco tramos, los seutores de l’AP-7 ente Barcelona y La Junquera y Montmeló-El Papiol, el de la AP-2 de Zaragoza a El Vendrell, el de Barcelona-Montmeló y el de Mongat-Mataró. Amás,  la AP-9 vien de recibir del Gobiernu estatal una emportante bonificación qu’anidia les sos tarifes.

Dende la so creación, l’autopista asturiana vien quedándose al marxe de les socesives lliberaciones y ventaxes que recibieron el restu, inda cuando los impuestos de los asturianos utilicense pa pagar los gastos de toes eses autopistes yá gratuites; amás, l’autopista asturiana destaca tamién por tener una de les tarificaciones más altes por km, siendo la segunda más cara de la rede estatal.

L’axudicación pal Güerna tendría de rematar esti añu, dientro poco más d’un mes, pero Aznar y Álvarez Cascos decidieron ampliar esta concesión, convirtiendo a la principal conexón de Asturies con España na prórroga más llarga del Estáu, hasta’l 2050, superando’l plazu inicial en nada menos que 29 años y escosando el tope llegal de 75 años de concesión. Los socesivos programes electorales de tolos gobiernos, tanto asturianos como españoles, inclúin la supresión o siquier rebaxa d’esti peaxe, anque nos últimos “intentos de negociación” tan solo se fala de “bonificaciones”… que tampoco nun lleguen.

Paez ser que, tampoco en cuestión de vies de comunicación, Asturies nun ye tan “dueña’l so destín” como cacarexa’l so presidente.

F. Marqués