• Portada
  • >
  • Asturies
  • >
  • La Sablera de Salencia presenta 5 vegaes más materia fecal de la permitía

La Sablera de Salencia presenta 5 vegaes más materia fecal de la permitía

  • 24 Agostu, 2021

La Coordinadora Ecoloxista d’Asturies deteuta una cantidá alarmante de residuos sólidos y fecales na Sablera de Salencia ya’l ríu Llindebarcas

Los fuertes arrecendores lleven años alertando de la presencia de contaminación fecal, tanto na salida de la depuraora asitiá na llocalidá de Novellana, nel conceyu de Cuideiru -xestionada pol Consorciu d’Agües d’Asturies (CADASA)-, como na desembocadura del ríu Llindebarcas na sablera de Salencia, 170 metros pabaxo de la nomada depuradora.

Una simple ispeición visual permite observar gran cantidá de residuos sólidos, plásticos y toballines na salida del desagüe de la depuraora, indicando l’ausencia de filtrau o depuración del agua anantes del so arramau al ríu. 

Sollertaos por estos fechos y pol continuu trasiegu de camiones y tractores con cubes d’agües residuales faza la depuraora, el 15 d’agostu de 2021 miembros de la CEA recoyeron delles amueses d’agua nel ríu Llindebarcas, tanto na salida de la depuraora como na so desembocadura na sablera de Salencia. Tres de los análisis de les amueses nun llaboratoriu acreditau, los resultaos arroxaron valores muy elevaos de coliformes fecales, con niveles d’Escherichia coli superiores a 2400 u.c.f. en tolos puntos (el llímite llegal pa considerar una playa apta pal bañu son 500 u.c.f )

Tres de la confirmación de les sospeches d’estos graves arramaos, tanto sólidos comu fecales, direutamente al ríu Llindebarcas, solicitaron al Conceyu de Cuideiru, a la Confederación Hidrográfica, a la Demarcación de Costes y al Gobiernu d’Asturies, qu’abran los correspondientes espedientes sancionaores a los responsables de dichos arramaos continuos. Asinamesmo, soliciten que se realice un analís esaustivu de la situación y se tomen les midies afayaices pa evitar los daños ambientales y sanitarios al entornu, asina comu declarar como non apta pal bañu la sablera de Salencia, mui concurría nesta época braniega, señalizado afayaizamente dichu espaciu fasta que nun s’igüe esti grave problema.

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies