Asturies ye antitaurina

  • 10 Agostu, 2021

La tradición asturiana de relación colos animales ye bien desemeyada de la española y nun almite la crueldá pa con ellos, menos entá cola esculpia d’una teórica “cultura y padremoñu”  que nos son dafechu ayenes y que nun representen sinón precisamente eso, la imposición d’una cultura y unos vezos españoles, que non asturianos

La refuga a la tauromaquia n’Asturies remóntase al añu 1914, cuando la Sociedá Antiflamenquista Cultural entamaba un manifestamientu públicu demandando l’anulación de la Feria de Begoña, en Xixón. De magar entos, la presión popular foi finando pali que pali colos escasos puntos de cellebración d’esti xabaz vezu español y namás en Xixón  se caltien, una vegada al añu y gracies a fuertes sovenciones la feria teurina, seique ya se trató delles vegaes en plenu municipal la posibilidá de desaniciala dafechu.

Poro, la noticia de la futura cellebración d’una nuviellada en Cangues d’Onís el prósimu 22 d’Agostu sentó como una patá a la sociedá asturiana, que reacionó darréu convocando movilizaciones, llanzando comunicaos y recoyendo robles a la contra de la so cellebración.

Los razonamientos son cenciellos: brutalidá, crueldá, imposición cultural, barbarie, españolismu del más ranciu…

Con eses premises se manifestaron ayeri na plaza Camila Beceña de Cangues de Onís pa desixir la cancelación de la nuviellada que la Fundación del Toro de Lidia pretende cellebrar nel conceyu, depués de más de cuarenta años llibres de tortura animal. Y con esos mesmos argumentos van recoyéndose alrodiu de 3.000 robles na recoyia entamá con esi envís en charge.org.

Especialmente duru ye’l comunicáu qu’al respeutu espublizó la formación nacionaliega Andecha Astur, qu’amplía la protesta non solo a Cangues d’Onís sinón a la cellebración de les matances de toros qu’otru añu se van facer en Xixón. Pa ellos nun se trata namás d’una cuestión de xabacidá, seique esa seya una parte importante de la so oposición, sinón tamién una cuestión d’imposición de los valores y cultura españoles, tan desemeyaos, tamién na rellación colos animales, a los asturianos.

“N’Andecha Astur defendemos una Asturies llibre, llibre de matances de toros, d’espeutáculos sanguinarios que se mazcariten d’enventos culturales, de folixes de sangre qu’estimulen lo pior de della xente, d’amueses públiques de tortura que se publiciten comu arte… Una Asturies llibre d’imposiciones de modelos culturales ayenos a los nuesos, porque la tradición que’l Pueblu Asturianu tien de compartir el territoriu col so ganao ye, comu se sabe y se ve, bien estremá de la española”.

Destaquen tamién nel so comunicáu la incongruencia de que la llei afitada pol PP en payares del 2013  y que blindaba llegalmente les matances de toros nun fuere desaniciada pol “progresista” gobiernu del PSOE, IU y Podemos. Esa llei  afita “ la regulación de la Tauromaquia comu padremuñu cultural” y afita que la matanza toros ye “parte esencial del Padremuñu Hestóricu, Artísticu, Cultural y Etnográficu d’España”.

Esi ye’l quid, pa los nacionaliegos, de la cuestión. El padremoñu español, per delantre de too, “Hai dalqu qu’importa muncho más que la sofrencia los animales: siguir imponiendo un modelu cultural únicu y español a tol territoriu l’Estáu. El valor de la tauromaquia comu preséu d’españolización, eso ye lo que defenden. Col meyor estilu franquista: pan y toros.”

Por tou ello, desixen al Gobiernu d’Asturies, sofitáu por PSOE/IU/Podemos, qu’aprebe una llei de non maltratu de los animales, qu’incluya comu maltratu y tortura les matances de toros. Persaben qu’eso va dar orixe a un conflictu col Tribunal Costitucional español y colos grupos de presión del españolismu taurín, pero, aporfien dende Andecha Astur “hai qu’atalantar esos conflictos comu ocasiones importantes pa recuperar la capacidá política autónoma del Gobiernu asturianu y p’avanzar nun alderique social que fine coles matances de toros”.

Nel mesmu sen piden a la Casa Conceyu de Xixón, con una alcaldía sofitá por PSOE/IU, que rescinda los contratos asumíos pa la cellebración de matances de toros na ciudá y que camude les ordenances municipales necesaries pa regular ñidiamente que la Plaza Toros de Xixón sólo se podrá usar n’eventos culturales que nun incluyan matances, nin maltratu o ofensa a la dinidá y drechos de los pueblos, les presones y los animales.

Pa finar, piden a la Casa Conceyu de Cangues d’Onís, rexía pol PP, que desautorice la matanza nuvielles prevista pal prósimu 22 d’agostu entamá pola “Fundación Toro de Lidia”, asina como cualisquier otru espeutáculu que nel futuru se quiera cellebrar nel conceyu ya incluya maltratu o muerte d’animales.

Llucía F. Marqués


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies