La Universidád’Uviéu protagoniza un nuevu casu d’asturfobia al suspender a lo menos a tres alumnos por presentar un trabayu n’asturianu

Iniciativa pol Asturianu denuncia un nuevu casu de discriminación llingüística na Universidá d’Uviéu. Los fechos ocurrieron nel títulu propiu tituláu ‘Especialista n’Asturies. Espaciu, Patrimoniu, Hestoria, Cultura’, lo que lo fai especialmente llamentable.

A lo llargo del cursu, dellos alumnos presentaron diferentes trabayos, xeres y actividaes n’asturianu ensin que se yos notificare qu’esto implicaba dalu problema, faciendo un usu normal del idioma. Al llegar el resultáu de les evaluaciones finales, la calificación d’un d’estos trabayos apaecía como “non presentáu” y polo tanto, l’asignatura con un suspensu pa lo menos trés alumnos que dieron anuncia d’esta discriminación. Y ye qu’al consultar el motivu d’esta calificación la rempuesta foi que l’actividá taba fecha n’asturianu, reclamándose-yos la traducción del trabayu al castellán como condición pa poder ser evaluaos. Dempués de reclamar y nun tener rempuesta del profesor responsable, na segunda convocatoria, el director del Títulu propiu asumió la corrección de la xera, como compromisu personal del docente. Sicasí, reclamen dende Iniciativa Pol Asturianu, los drechos llingüísticos nun puen depender del voluntarismu de los docentes y ye imprescindible que s’aprebe la Oficialidá comu garante del acabu de les discriminaciones.

Ente tantu y non, l’asociación fai un llamáu a la istitución académica pa que s’igüen de manera definitiva estes situaciones, ensin qu’en dengún casu ello implique carga estra sobre l’alumnáu que decide espresase n’asturianu. Amás, la entidá recuerda que la oficialidá ye la ferramienta constitucional qu’aporta igualdá pa les persones independientemente de la llingua que falen. “Nadie tien que ser discrimináu pola llingua que fale, seya castellán oasturianu”.

Redaición InfoAsturies

This work is licensed under a Creative Commons Attribution 4.0 International License.