El proyeutu d’ocalital, qu’ocuparía 20 hectárees y ta entá pendiente d’aprebación, foi aceutáu pol Conceyu de Llanes pesi a presentar delles irregularidaes
Vecinos y usuarios de la sablera de Cueves del Mar aconceyáronse ayer pa facer pública la so oposición al proyeutu presentáu por un terrateniente priváu pa llantar 20.000 ocalitos nun tarrén de cuasi 20 hectárees.
Aparte de los evidentes motivos ecolóxicos y paisaxísitcos que desaconseyen el llantáu d’ocalitos en cualisquier tarrén ayenu a la so Australia orixinal, esti proyeutu inclúi irregularidaes manifiestes, comu incumplir l’espaciu mínimu de 60 metros permitíu pente los ocalitos y les finques collindantes, dalgunes d’elles a namás 20 metros, la utilización de la especie d’ocalitos nintens, illegal n’Asturies pol so calter invasor o l’ausencia del estudiu mediuambiental pertinente pa ocalitales de más de 10 hectárees.
L’alcalde de Llanes, qu’acudió a Nueva pa falar colos vecinos, argumenta qu’aceutaron el proyeutu d’ocalital “Polos beneficios que traería al conceyu”, ensin especificar que beneficios sedríen esos, pero traten de quitar fierro al asuntu cola esculpia de que “igual nun se lleva a cabu”.
Llucía F. Marqués
This work is licensed under a Creative Commons Attribution 4.0 International License.
