Un de los sos trabayadores foi contratáu como informáticu en práutiques y acabó de mozu d’almacén ensin contratu ya ensin cobrar
La CNT convoca un boicó a la empresa Idhea Herrajes, especializada na fabricación de ferraxes y acesorios pa muebles, que ta asitiada na cai Max Plank 295 de Xixón, por incumplimientu de contratu y promeses, inadecuación del puestu a la categoría profesional contratada ya impagu del últimu salariu.
La empresa “contrató” al trabayador afeutáu en práutiques como informáticu, cola promesa de face-y un contratu en condiciones n’unos meses. La situación foi deteriorandose de manera qu’al cabu d’esos meses atopóse trabayando llueñe de los ordenadores, nel almacén, ya ensin contratu.

Pa rematar, cuando dexa’l trabayu -por razones obvies- la empresa decide nun integra-y el salariu correspondiente al caberu mes.
Lo qu’agora reclamen dende’l sindicatu ye principalmente’l pagu de los salarios, non solo esti postreru, sinón la diferencia ente lo que cobró y los salarios reales que tendría de cobrar llegalmente l’emplegáu, y como midida de presión llamen al boicó a Idhea Herrajes, anunciando amás l’entamu d’acciones llegales y sindicales frente a los abusos de la empresa.

Redaición InfoAsturies