Sidoro Villa, Alejandro Fernández Osorio, Xune Elipe, Alberto Vázquez, Inaciu Galán, Vero Suari y la compañía Hixénicu Papel recibirán mañana los sos premios
Tres el retrasu impuestu pol andanciu, el xueves 17 tendrá llugar la Gala d’Entrega de los Premios Lliterarios que convoca la Conseyería de Cultura, Política Llingüística y Turismu correspondientes al añu 2020
El Premu de novela “Xosefa Xovellanos”, ya na so 41ª edición, recoyerálu Sidoro Villa pola so obra “El Fervinchu”, entantu que’l 26 Premiu “Xuan María Acebal” de poesía sedrá pa Alejandro Fernández Osorio, por “Tayu”. Xune Elipe ye’l galardonáu cola 26 edición del Premiu “Máximo Fuertes Acevedo” d’Ensayu, pol so trabayu “Hai una llinia trazada”.
Más reciente ye’l premiu “Alfonso Iglesias” de Cómic, con 12 años de trayeutoria y que sedrá recoyíu por Alberto Vázquez, autor de “El sol na escombrera”. Cola mesma antiguedá, el premiu “María Josefa Canellada” de Lliteratura Infantil y Xuvenil, que recibirán en comuña Inaciu Galán y Vero Suari, por “La Curuxa Catuxa”. Pa finar, “El Viaxe de Cavaleti”, de la compañía Hixénicu Papel, recibirá el más reciente de los galardones, el Premiu “Nel Amaro” de Teatru Profesional, anguañu na so 4ª edición.
L’actu institucional tendrá llugar esti xueves, 17 de xunu, na sala Chill-out de La Llaboral Centru d’Arte y Creación Industrial de Xixón, a les 18:30 hores y va cuntar cola actuación musical d’Ana Fernández Palacio (pianu) y Naomi Suárez González (viola). Remembra-y Pola mor de les restricciones sanitaries tien que facer reserva (nome, apellíos y teléfonu de contactu) nes señes de corréu: spconocimientu@asturias.org.
La ocasión ye tamién una oportunidá pa ver, nel mesmu Centru d’Arte y Creación Industrial, la esposición Nel Amaro – Postal /Visual, inaugurada na 42 Selmana de les Lletres Asturianes y que va tar abierta dica’l 26 de xunu.
Nuria Prendes
This work is licensed under a Creative Commons Attribution 4.0 International License.
