Fuelga de profesoráu interín el 14 d’abril

  • 7 Abril, 2021

Los sindicatos convocantes declaren que ye imprescindible dafechu estabilizar al profesoráu interín y que siguir alantre col desendolcu de los procesos seleutivos 2021 nel ámbitu docente ye fardar d’una normalidá que ta lloñe de ser real

Les Organizaciones sindicales SUATEA y SINTTA resolvieron convocar a la fuelga a tol profesoráu interín d’Asturies el prósimu 14 d’abril de 2021. Les revindicaciones del coleutivu son dos, una rellacioná cola so situación llaboral y la necesidá d’un nuevu Alcuerdu d’Interinidá que garantice una mayor estabilidá y otra coles pruebes d’acesu a los sos puestos, que piden que se retrasen por mor de les peculiares circustancies d’esti cursu.

Los procesos seleutivos d’Educación convocaos pa los Cuerpos de profesoráu d’Enseñanza Secundaria, profesoráu Téunicu de Formación Profesional y profesoráu d’Escueles Oficiales d’Idiomes tán convocaos pal próximu mes de xunu de 2021, metanes el fin de cursu escolar. Según los sindicatos, esta convocatoria tan temprana ye desaveniente, daes les dificultaes que presentó esti cursu -semipresencialidá, grupos estremaos, control de midíes sanitaries, falta de medios…- que xeneraron una importante sobrecarga de trabayu al profesoráu y per ende situaciones d’alto estres y ansiedá. “La prioridá pal personal docente ta siendo facer el so llabor cola másima profesionalidá pa rematar el cursu ensin que l’alumnáu seya perxudicáu nun escenariu tan complicáu” declaren, pidiendo que nun s’enzanque entá más la situación de los interinos cola convocatoria d’unos procesos seleutivos nos que se xueguen los sos puestos de trabayu.

SUATEA y SINTTA aportunen en qu’esto ye una temeridá, en casu de que se celLebren, una perda d’esfuerzos en casu de que finalmente se suspendan a última hora y un caos organizativu nos centros, al simultanease les obligaciones docentes cola segunda dosis de la vacuna y l’asistencia a los exames, yá seya como aspirante o miembru de los tribunales “Siguir alantre col desendolcu de los procesos seleutivos 2021 nel ámbetu docente ye fardar d’una normalidá que ta lloñe de ser real “.

Consideren igualmente imprescindible la negociación d’un nuevu Alcuerdu de profesoráu interín qu’otorgue estabilidá al coleutivu. L’Alcuerdu a valir n’Asturies foi robláu por ANPE y UXT en 2014 y supon una discriminación flagrante pal profesoráu interín asturianu respeutu al restu l’estáu. Lloñe d’apostar por dar una cierta estabilidá al coleutivu interín valorando preferentemente la esperiencia docente (asina ye n’Andalucía, País vascu, Valencia, Galicia, Cataluña y Baleares, Cantabria), apostaron por otros criterios, sobrevalorando la nota nos procesos seleutivos, lo que supón la renovación de llistes tres les oposiciones y la continua rotación nel emplegu.

Per otra parte, los sindicatos resalten que “l’espíritu l’Alcuerdu a valir, en base a les últimes sentencies, afaise cada vegá menos a los fundamentos de drechu español y comuñal y, amás, allóñase sustancialmente de los últimos informes publicaos por persones prestixoses del mundu de la xudicatura”.

L’índiz de temporalidá nes Alministraciones Públiques ye un grave problema que vien de llueñe y riquier una intervención urxente. Les Alministraciones Públiques utilizaron la fórmula de contratar a personal interino, non pa resolver cuestiones temporales, puntuales y urxentes, como dexa la normativa, sinón pa cubrir puestos y vacantes permanentes y de cadarma. Poro, consideren  imprescindible estabilizar al profesoráu interín qu’anguañu ta trabayando n’abusu de contratación temporal y a tou aquel que quedó nel camín dempués d’años trabayando pa l’Alministración educativa. Coles mesmes reclamen axustar un nuevu Alcuerdu que s’axuste a les pretensiones del drechu européu y la so supremacía, y que nun suponga’l despidu del profesoráu interín nel presente y nel futuru.

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies