La partida presupuestaria destiná a iguar y caltener una de les edificaciones más emblemátiques del país ye namás de 150.000 euros
N’Asturies hai ente 20.000 y 30.000 horros y paneres, ensin qu’esista un cómputu fiable, a falta d’un catálogu actualizáu de los mesmos y del so estáu. Bona parte d’ellos tan en males condiciones ya en riesgu de baltar. Un percorríu a cualisquier conceyu ye abondo p’alcontrar dellos n’estáu ruinosu. El “Principado” declárase “desbordáu” poles 558 pidiciones d’aides pa refacer estes edificaciones.
Les sovenciones cacarexaes dende Cultura comu “una importante midía de l’alministración pa prevenir el desaniciu del padremoñu arquiteutónicu asturianu” dotáronse con un presupuestu total de 150.000 euros. En casu de repartise pente les 558 pidiciones, tocaríen a 268 € caún. Sicasí, siempres pueden repetir el sistema del 2018, cuando de les pidiciones presentaes nun se dio aida a más qu’un horru, siendo toles demás refugaes.
Los propietarios, nos casos en que tean vraeru interés por caltenelos en pie, non solo tienen difícil aceder a una sovención curiosa, sinón que cuando quieren remozar un horru alcuéntrense con un marabayu de permisos y torgues alministratives que retrasen les igües y dan p’atrás a los menos decidios “14 meses de dolores de cabeza , permisos, proyeutu, tases , impuestos y cerca de 20.000 euros de gastu” relata’l propietariu d’un horru recién remozáu en Blimea.
Too ello fae posible casos comu’l del horru de Vis, murniamente famosu, y centenares d’otros que ca añu van desfaciéndose, dexando güérfanu’l padremoñu y paisaxe asturianos.
Llucía F. Marqués
This work is licensed under a Creative Commons Attribution 4.0 International License.
