Alón Tránsitu de les Ballenes

  • 10 Febreru, 2021
Depués d’estrenar el so estilo parche d’asfaltu nel Tránsitu les Ballenes, el conceyu de Xixón tien previsto “iguar” l’empedráu del Camín de la Fontica,  de la cai Sebastián Miranda y la entrada a Cimavilla pel Campu Valdés, lo que fae temer agravios mayores nel más emblemáticu de los barrios xixoneses
Mentantu les ciudaes europees ponen tol so enfotu’n caltener les sos señes d’identidá arquiteutóniques, incluyendo’l so pavimentu orixinal, o incluso se ponen empedraos onde enxamás los hebio, porque queda guapo y da calter, en Xixón alquitranen una de les cuestes más mítiques del so barriu más emblemáticu. Una cuesta que xune la mar coles cases de los pescaores, per onde se subíen les ballenes na dómina en qu’entá había ballenes que subir, un chigre de los más antiguos y auténticos, una hestoria, una identidá… paez que los nuesos gobernantes son especialistes n’esborriar el pasáu y desaniciar cualisquier ñiciu de les nueses señes.

Cimavilla pierde con esta estroza parte la so identidá, y con ella Xixón entero. Incluso dexando a un lláu la cuestión estética ya identitaria, si se considera dende un puntu de vista estrictamente económicu, nuna ciudá que se quier vender comu turística, l’empedráu de la Cuesta les Ballenes cola so hestoria mítica de pescaores y cetaceos tenía una relevancia perimportante. A la ciudadanía escapase-y el porqué d’esta actuación urbanística, que traten de xustificar oficialmente pol mal estáu de los adoquinos y la necesidá de facilitar el pasu de coches, cuando ye evidente que los adoquinos puen iguase, nun ye tan difícil caltenelos en bon estáu y si se faen bien les coses incluso pueden circular los coches perriba -comu se fae en tantes otres ciudaes nes que se curia’l padremoñu-. Sobro los costazos de los playos pende otra menacia: depués del Tránsitu ta previsto poner en marcha actuaciones asemeyaes en delles de les cais empedraes de Cimavilla. Pa echase a tremar.

Llucía F. Marqués

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies