Un meme del nuesu collaborador habitual Gonzalo Peláez, orixe d’una auténtica marexada nes redes sociales
El tuit de Gonzalo Peláez cuestionaba de forma graciosa que’l direutor de la Oficina de Política Llingüística otorgara’l 100% de les sovenciones posibles a la so antigua editorial, y en principiu nun pasó de ser un de los memes más qu’espubliza esti perfil de twitter y que recoyemos na seición d’humor del nuesu mediu de comunicación.
Más tarde, la Plataforma contra la oficialidá aprovechó esi meme n’una de los sos avezaes esbabayaes, que pasó ensin pena nin gloria, pero foi Damián Barreiro, quien recoyendo’l tuit de la mentada plataforma, provocó una impresionante marexada, al pretender atribuyir el meme orixinal a Andecha Astur y equiparándola con VOX.
De magar ende fueron apaeciendo rempuestes contundentes a la manipulación de Damián Barreiro, cuyes invectives escontra Andecha Astur constitúin toa una obsesión, y fueron apurriendo en respuesta al mesmu, datos na llínea de confirmar los criterios políticu-clientelares nes sovenciones de la Oficina de Politica Llingüística, con sentencies del propiu Tribunal Superior de Xusticia d’Asturies y recordando lo revesoso del nomamientu d’Antón García como direutor de Política Llingüística, y cómo nos 80, na epoca de los centros pilotu de Llingua Asturiana, nomaron a Antón García director del Serviciu de Política Llingüística a sabiendes de qu’incumplía los requisitos llegales pa ocupar dichu cargu, qu’a la fin se vio forzáu a abandonar.
Magar los insultos arramaos por Damián Barreiro escontra Andecha Astur equiparándolos a VOX “los mesmos argumentos, les mesmes maneres, la mesma mierda.”, la organización política asturiana nun quinxo entrar na confrontación, y entrugada por esti mediu afirmó que “Andecha Astur nun va entrar n’insultos y discutinios estériles en momentos nos que lo qu’hai que priorizar ye la llucha pola Oficialidá, por forzar al PSOE, IX y Podemos a que cumplan les sos promeses”.
Quien sí se manifestó en términos más duros foi l’Asociación Cultural N’Ast, que foi una de les qu’apurrió datos concretos de casos nos que quedaba n’evidencia la falta de tresparencia de la Oficina de Política llingüística “Venimos denunciando dende siempres la rede clientelar afitada alredior de dicha Oficina, y el casu actual, el del 100% de les sovenciones posibles a l’antigua empresa del direutor de dicha Oficina de Politica Llingüística nun suena precisamente bien, riquíos por Damián Barreiro facilitamos casos concretos nos que queda reflexada esa forma de furrulamientu, y al poco d’escomenzar el discutiniu tábemos recibiendo más información nel mesmu senu. A la fin, decidimos dar por acabáu’l tema porque ye conocía la obsesión de @damiandbm con Andecha Astur, y porque valoramos qu’a la fin los insultos y el falsu discutiniu aniciáu por Damián Barreiro nun beneficien namás qu’a los postulaos del españolismu.”
This work is licensed under a Creative Commons Attribution 4.0 International License.
