Beatriz Manchón, piragüista tricampeona del mundu, ta dispuesta a llevar al Comité Organizaor del Descensu Internacional del Seya al Tribunal Costitucional o inclusive si ye preciso, al Tribunal Européu de los Drechos Humanos, por discriminación por xéneru

La piragüista, que cunta col sofitu del so compañeru, el diez vegaes campeón del mundu de piragüismu Manuel Busto, lleva dende va cuatro años engarrándose pol drechu a competir n’igualdá de condiciones que los homes na conocía preba internacional, pero nun foi fasta esti mes que l’Altu Tribunal almitió a trámite’l so casu.

Les normes discriminatories del Descensu Internacional del Seya torguen-yos, a ella y a Bustu, competir na sección principal dientro de la categoría de K-2 d’embarcación mista. Dicha estaya ta vetá a les muyeres, a les que se-yos torga participar na contrarreló clasificatoria previa qu’asigna los primeros puestos de salida, lo que les lleva a salir siempres nos peores puestos, ensin posibilidá d’optar a victoria. Ello ye que tantu les embarcaciones femenines como les mistes tienen d’entamar el Descensu’l Seya de magar la posición númberu 600.

Tres de la negativa por parte’l Comité Organizaor a la so iscripción na categoría absoluta, los dos campeones del mundu recurrieron a la Federación de Piragüismu, au alegaron “falta de tiempu” para solucionar la cuestión nel momentu. Sicasí, l’añu viniente volvieron ser vetaos polos organizadores, que llegaron a declarar que “les muyeres pueden causar salíes pelligroses“.

La participación na categoría masculina d’embarcaciones mistes ta espresamente recoyía na normativa de la Federación de Piragüismu y de fechu Beatriz ostenta dellos títulos internacionales llograos nesta estaya; amás, tantu la Federación como’l Conseyu Cimeru d’esportes soscribieron nel 2009 un Manifiestu pola igualdá y la participación de la muyer nel esporte. Entá asina, dengún de los organismos reconocieron el drechu a competir n’igualdá de condiciones que Manchón reclama, polo que decidió allegar direutamente al Tribunal Supremu, onde si foi almitíu a trámite’l recursu presentáu polos demandantes. En casu de qu’esti tamién emita una sentencia desfavoratible, va recurrir al Tribunal Costitucional ya inclusive ta dispuesta a llegar al Tribunal Européu de Drechos Humanos (TEDH), si ficiere falta.

Nel Dos Santos