• Portada
  • >
  • Esportes
  • >
  • Les Piragües refuguen a la campiona Beatriz Manchón por ser muyer

Les Piragües refuguen a la campiona Beatriz Manchón por ser muyer

  • 31 Xunetu, 2017

La organización de la prueba, que llegó a dici-y que “les muyeres son un estorbu na salida”  argumenta que’l reglamentu nun dexa participar a una pareya mista nel percorríu dica Ribesella

Beatriz Manchón, con dieciséis medayes mundiales ente los años 1997 y 2009 y ventidós medayes en campeonatos europeos de piragüismu cuntaba realizar el LXXX Descensu Intencional del Sella en compañía del piragüista maliallu Manuel Busto, con ocho trunfos nesta prueba. Sedría la primer vegada qu’un equipu mistu encarara la prueba absoluta, enfrentándose a los equipos de K-2 sénior masculín n’igualdá de condiciones.

Sicasí, el Comité Organizador del Descensu Internacional del Sella (CODIS) refugó-yos el permisu, unviándolos a la prueba menor, con llegada en Lloviu, con un curtiu mail: “Cuidao qu’esiste la categoría mista, nun procede la inscripción de la so embarcación en K-2 sénior masculín. Esculpen les molesties”. Telefónicamente fueron más esplícitos, llegando al ataque misóxinu «Dixéronnos de forma verbal qu’una muyer na salida absoluta del Sella ye un estorbu», afirmó Manchón nos  micrófonos de RPA. «Atópome discriminada por ser muyer».

Por si quedara dulda de que se trata d’un casu de discriminación, Juan Manuel Feliz, presidente del CODIS amosó nuna amuesa d’anacronismu la so esmolición por que “supla l’exemplu y se presenten más.” –anacronismu que tamién amuesa’l cartel de la preba, con la mascota “Cobi”, del añu 92-

Sicasí, la Conseyería d’Esportes d’Asturies niega qu’haiga discriminación, una y bones esta diferenciación ta, efeutivamente, recoyida nel reglamentu de Les Piragües y al paecer la discriminación, si ta nel reglamentu, yá nun lo ye tantu.

Curiosamente la organización nun amosó esmolición dalguna pola progresiva dexeneración del eventu deportivu nun macrobotellón masificáu, nin polos recientes datos del dañu ambiental causáu al reu Sella pol escesu de piragües -que lleguen  a sumar les 3.500 diaries- nel so calce a lo llargo de tol añu.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies