L’Asociación Teito Natural Roof, denuncia’l desaniciu de diez teitos al añu; na cabera década desapaecieron un terciu d’estes edificaciones en Somiéu
De los cerca de 200 teitos censaos nel conceyu Somiéu, poques tan en bones condiciones de conservación. La perda y avieyamientu de población rural ya’l desentendimientu istitucional de lo que ye una pieza de gran valir a nivel etnográficu van dexando estes costruciones ensin naide que les curie. Amás, la mesma “proteición” que los dexa cayer torga’l so usu pa otres finalidaes, comu la turística-etnográfica.
Ye imprescindible recoyer la escoba, camudar un terciu de la so cubierta al añu, revisar les vigues… pero nun hai quien lo faiga, polo que Teito Natural Roof vienen de proponer a la direición del parque natural la formación d’una cuadrilla pa rehabilitalos, que cuente con polo menos parte del personal formáu pa ello.
La llexisllación tampocu agabita, pa poder percibir una aida oficial a la recostrución ye preciso presentar un proyeutu d’un profesional, ya nun val que los propietarios o los vecinos, con conocimientos ancestrales na materia, lo igüen. Poro, propónse la creación d’una escuela de teitadores.
Vitor Corte
This work is licensed under a Creative Commons Attribution 4.0 International License.
