Llebávemos tiempu esperándolu y ya ta a la venta, en llibreries, xugueteríes o per internet, el primer “Trivial” 100% asturianu, perfechu pa tardis en casa ya imprescindible’n cuarentenes y confinamientos
Acuto Xuegos, creador del xuegu, ye una aniciativa que ñació nel 2019 cola idega de crear xuegos pa que la reciella pudiere tener la posibilidá de xugar na so llingua, pero col tiempu decatáronse de qu’a los mayores tamién nos presta la idega de xugar n’asturianu, asina que depués del Xuegu les Pallabres, el Dominó y los puzles sacaron esti xuegu, pensáu pa toles edaes, nel que se pon a preba los conocimientos sobre Asturies.
El “¿Cuála ye?” ye un xuegu de la familia del tipu Trivial, que tien tableru, fiches, dadu y 150 tarxetes con 900 entrugues estremaes en seis temátiques distintes sobre Asturies y n’asturianu: Hestoria, Cultura, Esporte y Sociedá, Llingua y Lliteratura, Ciencia y Naturaleza y Xeografía y Conceyos..
Pa la preparación de les entrugues collaboraron persones con destacaos conocimientos en dellos ámbitos de la realidá asturiana: Alberto Peña, Xurde Morán, Bertu Ordiales, Inaciu Galán, Laura Marcos, Dani García de la Cuesta, Víctor Suárez, Antón Caamaño, Rubén Magadán, Ramón d’Andrés, Rafa R. Valdés o Sociedá Etnomotora Asturiana (SEMA), pente otros-
La espublización del “¿Cuála ye?” vien tres una campaña de crowdfunding na qu’alcontró sofitu social suficiente pa la so espublización, vendiendo más de 180 exemplares y recaudando más de 7,000€.
El xuegu ya s’alcuentra distribuyíu per distintos puntos d’Asturies y disponible en venta online a traviés de Acuto Xuegos. Tien un preciu de 42€.
Redaición InfoAsturies
This work is licensed under a Creative Commons Attribution 4.0 International License.
