Entama’l cursu y entama otra vegada la discriminación de los rapacinos nes fasteres rurales. Colos colexos de los pueblos presllaos nun queda otra qu’escoyer pente colar a la ciudá o resinase a madrugar más que’l resto y a etenros viaxes diarios a escures per carreteres non siempres en bones condiciones… eso los que tienen suerte
Más de 400 families d’escolinos de Roces manifiéstense pola imposibilidá de caltener les midíes de seguridá colos 8 autobuses de rapacinos qu’aporten del Xixón rural. Ca díe dalgún queda ensin sitiu, por ser insuficientes les places, y la falta de coordinación pente la entrada/salida escalonada del cientru y los horarios de llegada/salida de los autobuses xenera non poques aglomeraciones nes paraes.
Les families de siete escolinos de Quirós denuncien que pasen fasta una hora percorriendo’l conceyu en tasi, recoyendo compañeros, anantes d’aportar non ya al colexu, sinón a la parada del bus escolar.
Pior lo tienen dos neñes de Vixidel, Teberga, y Tene, Quirós, a les que a día de güei siguen ensin recoyer pa llevar a clas. Ca mañana esconsoñen ceo y van a la parada a les 6 y media, hora y media anantes de la entrada en clase; ye nueche presllada y güei en concreto la turbonada facía abegosa la espera, pero tampocu güei aportó’l tasi, nin el bus, siguen ensin tresporte escolar.
En Vixidel fasta l’añu pasáu había tresporte pa llevar la reciella al colexu o a la llínia del bus al istitutu de Trubia, pero esti añu, al quedar namás una estudiante de secundaria, deniégase’l tresporte pa esos 5 km. “Lo curioso del asuntu” comenta una compañera del istitutu “ye que si faltamos a clase por que queremos o por miéu al covid denuncien a les nueses families, pero ella nun vien por culpa’l gobiernu y nun pasa na.”
Llucía F. Marqués
This work is licensed under a Creative Commons Attribution 4.0 International License.
