Esti añu cellebróse, na fecha prevista pal XLI Día de les Lletres, un “Manifestamientu Virtual”, ya que tabemos metanes l’acorripiamientu
El próximu 2 d’ochobre, vienres, va cellebrase’l cuadraxésimu primer Día les Lletres Asturianes que s’aplazare’n mayu pola situación d’acorripiamientu prevocada pol andanciu.
Nel actu istitucional correspondiente tendrá llugar, xunto col avezáu discursu del presidente de l’Academia la Llingua Asturiana, Xosé Antón González Riaño, el nomamientu comu Correspondiente de Pablo Rodríguez Medina y l’actu de la entrega del Premiu Nacional de Lliteratura que, nesta segunda edición, recai en Xuan Xosé Sánchez Vicente.
La 41ª Selmana de les Lletres Asturianes cellebraráse del 28 de Setiembre al 2 d’Ochobre y esti añu tará dedicada a recuperar la figura de l’autora maliaya María Teresa Villaverde, Tuxa (1882-1934), una escritora de la primer metá del sieglu XX, poeta, narradora y dramaturga.
Entá nun hai noticies sobro la convocatoria del ya tradicional manifestamientu pola Oficialidá qu’aveza acompangar la cellebración d’esti díe y nel que ca añu dende va décades miles de persones ocupen la cai Uría reclamando pa los asturianos el drechu fundamental d’usar la so propia llingua.
Redaición InfoAsturies
This work is licensed under a Creative Commons Attribution 4.0 International License.
