La Coordinadora Ecoloxista d’Asturies denuncia que  la estación de control de la contaminación del Conceyu allugada nel Lloredal dexa de funcionar cuando se dispara la contaminación del aire

Ente’l vienres 21, cuando les cifres de bencenu taben disparándose en curva ascendente, llegando a marcar los 6 µg/m3 -la O.M.S encamienta nun superar los 1,7 µg/m3- , y el llunes 24, cuando la estación “resucitó”, pasaron trés díes nos que nun ufiertó datos na páxina Web del Principáu dedicada a apurrir los datos oficiales sobro contaminación atmosférica y calidá del aire.

El llunes, a reiniciase la espublización de datos, la estación sosprendió amosando datos igualmente esmolecedores, pero relativos a otru peligrosu contaminante: los valores d’azufre en forma de S02 aportaron a 129 µg/m3  -109 puntos periba lo encamentao- y darréu cortóse de nuevu la información, fasta dos hores más tardi.

Pa la Coordinadora Ecoloxista, estes casualidaes son sospechoses, igual que lo ye’l fechu de que’l Principáu” nun apurra datos en continuu de les 45 estaciones públicu-privaes, llindándose a ufiertar de manera siguida los datos de les sos propies estaciones, a les que camuden d’allugamientu en función de los resultaos, buscando siempres los allugamientos menos contaminaos.

Redaición InfoAsturies

This work is licensed under a Creative Commons Attribution 4.0 International License.