• Portada
  • >
  • Asturies
  • >
  • Cientos de persones concéntrense’n Xixón contra la Monarquía española

Cientos de persones concéntrense’n Xixón contra la Monarquía española

  • 21 Agostu, 2020

Nel actu camudóse’l nome de la Avenida “Juan Carlos I” pol de “Asturies nun tien Rei”

La convocatoria comuñal d’Andecha Astur, Anticapitalistes Asturies, Bloque Críticu, Centros Sociales d’Asturies, Comité pola Amnistía, CNT, CSI, Darréu, FAMYR, JCE m-l, Lluchando pola Soberanía y UJCE aconceyó a mediu millar de persones na Plaza la Estación del Norte, onde entama l’Avenida que llevaba entá el nome del rei fugáu.

 

Na llectura que Violeta Mateu fexo del comunicáu conxuntu recordóse la hestoria corrupta de los Borbones y la so estrecha rellación cola dictadura franquista, refugando esplícitamente l’actual marcu xurídicu-políticu, lo que inclui la Costitución española y l’Estatutu d’Autonomía “que mos prohibieron votar en 1981”.

Na intervención declaróse que’l fin de la monarquía ye un primer pasu nel sen de conseguir un futuru nel que la clas trabayaora asturiana seya protagonista y tenga nes sos manes les decisiones, llamando a rebelase ante la monarquía española ya’l capitalismu xabaz que “esplota la clas trabayaora” y “torga la libertá de les persones y de los Pueblos”. Nel testu hebio una alcordanza esplícita a los conflictos llaborales vixentes, a los trabayaores que pierden la vida nel puestu de trabayu, a la mocedá forciada a emigrar y a la llucha de les muyeres y los coleutivos LGTBI polos sos drechos, pente otros coleutivos primios pol sistema español.

Darréu, procediose al cambeu de nome de la cai, reemplazando la placa de “Avenida Juan Carlos I” pola de “Asturies nun tien rei”. La sustitución del nome ya taba decidía pol Conceyu Xixón pa los prósimos meses, ensin que tuvieren nidio el so nuéu nome, pero los convocantes consideren que nun pueden ser los mesmos partíos políticos súditos que-y la concedieron, lu aplaudieron y aplauden al so socesor, los que “tengan a bien, muertos de vergoña y complicidá, retirar esti nome indecente” polo que decidieron alantrase y ser ellos los que “esborrien el nome los Borbones d’esta placa de l’avenía y del nuesu futuru.

L’actu foi interrumpíu brevemente’n dos ocasiones, primero por un grupu de facistes que trataron de canciar el “Cara’l sol” pero que desistieron a les primeres notes ante l’actitú de los presentes y depués por un monárquicu escolforáu qu’hebio de ser reducíu pola policía.

Llucía F.Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies