• Portada
  • >
  • Esportes
  • >
  • El clú femenín Balonmán La Calzada queda ensin competir n’Europa

El clú femenín Balonmán La Calzada queda ensin competir n’Europa

  • 30 Xunetu, 2020

El Clú Balonmán La Calzada créase’n 1996 tres la fusión de dos clubes de balonmán, dando llugar a un nuevu proyeutu de referencia pa la zona oeste de la ciudá de Xixón, barrios onde s’atopen la mayoría de los colexos ya istitutos onde desendolquen les sos escueles esportives.
Anguañu, convirtióse nun clú femenín de referencia n’Asturies y nel clú de balonmano más importante del últimu llustru, en consiguiendo fitos hestóricos pal balonmán asturianu. Dende’l so ascensu a DHF (másima categoría) en 2016, fueron dos vegaes campeones de la Copa de la Reina, subcampeones de la supercopa y bronce na lliga DHF, clasificación europea. Entá asina, esti añu nun van competir na competición europea, non por falta de talentu nin de méritos, sinón por falta de medios económicos pa  ello.
Falamos con Manuela Fernández Ena, miembru de la xunta direutiva del clú y direutora esportiva delmesmu

 

Apocayá distis a conocer que la falta de sofitu económicu tórgavos competir esti añu na competición europea. ¿Qué implica esto pal clú?

Ye una tristura másima a nivel emocional el que nun se pueda faer efectiva la competición por cuenta de la falta de sofitos económicos y una frustración a nivel esportivu, cuidao que se consiguió per segunda vegada la clasificación por méritos na pista y nun se fai realidá fora d’ella.
Realicemos un esfuerzu enorme para llevar el nuesu equipu, el clú y la ciudá fora de les nueses fronteres y otra vegada nun foi posible, ye un varapalu terrible, pero a lo último ye parte de la nuesa vida esportiva, un partíu mas, esti perdímoslu pero de xuru que lu ganaresmos en dalgún momentu.
Sirve pa analizar l’estáu del esporte femenín y que siguen esistiendo munchos frentes abiertos pa camudar.

Anantes d’arrenunciar a esta competición fixistis un gran esfuerzu buscando sofitos. ¿Qué reacción atopastis na vuesa busca de patrocinadores?

La situación na que nos atopamos nun ye la más afayaiza pa pidir collaboración económica, sicasí, delles entidaes fixeron un esfuerzu por sofitanos y sumárense al proyectu, ello ye, que les empreses que sofitaron el suañu européu, entá nun saliendo a dicha competición, nun arrenunciaron al so sofitu y eso ye d’almirar. Per otru llau destacar qu’hai entidaes, quiciabes frutu tamién de la sociedá y de los cambeos polos que tenemos de lluchar, que nun amuesen interés pol esporte en sí y pol femenín en particular, nun son realmente conscientes de la repercusión que puede reverti-yos sofitar un equipu como’l nuesu.

¿Porqué creéis que nun foi posible axuntar la cantidá necesaria?Realmente xuntáronse dellos factores, la priesa por consiguir el sofitu, el momentu actual y que les entidaes inda nun son coscientes de la repercusión que recibiríen.

¿Sedría distinto si fuereis un equipu masculín?La verdá nun toi en situación de facer tala valoración, cuidao que nun hai nengún casu d’otru equipu nel nuesu esporte en tola comunidá que consiguiera los finxos que nós tamos llogrando. Lo que sí puedo dicir ye qu’inda hai una gran diferencia en cuanto al xéneru nos esportes, sobremanera a nivel nacional y desgraciadamente n’otres comunidaes si favorecen el proyeutu masculín en desterciu del femenín.

¿Y si se tratare d’otru esporte? asina, por dicir unu… ¿Si faláramos de fútbol? 

Pa responder un pocu a esa cuestión, na mio humilde opinión hai delles víes p’analizar, per un llau ta la tema del esporte como negociu, nesti casu encaxaría’l fútbol, que por cuenta de la afición qu’hai a nivel global y la cantidá de persones que mueve,  xenera cantidaes inxentes de dineru, toles empreses quieren publicidá al traviés del fútbol y anque ye totalmente llícito tamién ta nes nueses manes camudalo.

Pasa por que los medios de comunicación ufierten otru tipu de conteníos y que les persones amuesen adulces el so interés n’otru tipu d’esportes, esto ye, esi tipu de negociu esiste por qué la población consumelo.
Y per otru llau, ta la problemática del xéneru. Nesti sen hai inda (al igual que n’otros campos) enforma qu’avanzar, el primer pasu serdía profesionalizar toles lligues nacionales, crear convenios específicos, blindar les muyeres como esportistes y tolo que trai: maternidá, mancadures, acesu a puestos de responsabilidá, conciliación, etc.  Y de xacíu, pa min lo mas importante, visibilizar y ser responsables cola sociedá que queremos crear.

Dexando a un llau esta tema ¿Cualos son les vueses mires pal añu en cursu?

Agora enfrentamos a un cambéu de ciclu importante, que yá punxéramos en marcha l’añu pasáu en tolos estamentos del clú,  polo que les nueses mires pasen por clasificanos pa la segunda vuelta ente los 8 meyores equipos nacionales y poder consiguir el meyor puestu.

Dedicais una parte importante del vuesu tiempu al esporte de base, n’equipos infantiles y colexos. ¿Cómo se plantega anguañu, coles restriciones sanitaries, nesti sen?

Acaba de faese efectiva la noticia de que quiciabes nun haiga actividá estraescolar lo que mos afeutaría gravemente, non yá a nivel de clú y competición, si non inclusive a les nueses families, que nun van poder conciliar y les nueses neñes que nun van poder esfrutar d’actividaes saludables al traviés del nuesu esporte, sicasí, entendemos que lo primordial ye la salú comuñal y vamos afaenos a la normativa impuesta. Si podemos, la nuesa intención ye entrenar en pabellones municipales pa que puedan siguir faciendo esporte.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies