Andecha Astur considera que non solo nun se reconoz la emportancia hestórica del edificiu sinón que, al contrario, ta castigada pol so simbolismu, ya que otres costruciones debíes al arquiteutu Manuel del Bustosí tán catalogaes y protexíes pol Conceyu Xixón

La conocía comu Casa Blanca, na Plaza l’Istitutu (Xixón), fore nel añu 1937 la sé del Conseyu Soberanu d’Asturies y Lleón, lo que la convierte nun edificiu fondamental na hestoria d’Asturies. A ello súmase’l so interés arquiteutónicu, ya que ye una costrución bien representativa del Art Decó racionalista, obra de los pernomaos arquiteutos Manuel del Busto y el so fíu Juan Manuel del Busto, cuyes otres costruciones tan catalogaes y protexíes.

Andecha Astur, que ya colocare nel edificiu plaques que remembraren la emportancia hestórica del mesmu, toes elles desapaecies, torna agora a solicitar el reconocimientu de la Casa Blanca, presentando ante la Casa Conceyu de Xixón una propuesta compuesta de 6 aniciatives que daríen a la mesma el reconocimientu que merez.

La propuesta pidi la inclusión del edificiu nel inventariu municipal de bienes protexíos pol Catálogu Urbanísticu de Xixón, promoviéndose ente la Conseyería de Cultura que l’edificiu seya declaráu Bien d’Interés Cultural pol Gobiernu d’Asturies. Asina mesmo, consideren necesario precurar la conversión del edificiu en propiedá del Conceyu Xixón o del Gobiernu d’Asturies, pol so indiscutible interés hestóricu y dotalu  d’una placa que remembre el so papel nel furrulamientu’l Conseyu Soberanu d’Asturies y Lleón. Otra posible forma de reconocimientu sedría poner a la actual Plaza L’Istitutu el nome de Plaza del Conseyu Soberanu d’Asturies y Lleón, asina comu l’allugamientu d’un monumentu representativu.

Consideren que l’actual composición de la Casa Conceyu de Xixón, “que se diz progresista, abanderá de la xusticia social, partidaria de caltener la memoria hestório y de reconocer el padremuñu la ciudá, con una mayoría conformá por PSOE, IU y Podemos” ye la afayaiza pa sacar alantre estra propuesta y salvar con ello la esistencia y la memoria hestórica de la Casa Blanca.

Redaición InfoAsturies

This work is licensed under a Creative Commons Attribution 4.0 International License.