Un vecín de Gozón vese forciáu a recurrir al amparu del Defensor del Pueblu y del Conseyu de Tresparencia pa que l’alcalde del so conceyu-y apurriere la información urbanística que solicitare
La quexa, presentada por un particular ante’l Defensor del Pueblu por nun poder aceder a un espediente urbanísticu, llevó a esti ente estatal a xunise a les llamaes d’atención que dende’l 2019 lleva faciendo al Ayuntamientu de Gozón el Conseyu de Tresparencia.
Foi necesaria esta intervención esterna pa que l’alcalde, el socialista Jorge Suárez, depusiere la so actitú caciquil cola que ñegaba l’acesu a la información pública y apurriere al demandante la información requiría, referente a un espediente urbanísticu d’un núcleu de viviendes afeutaes pol desllinde de costes. Jorge Suarez insiste en que con ello ya facilitaron al interesáu “tola documentación cola que cuenta el Consistoriu al respeutu y que la llei permite apurrir”, insistiendo en que nun queda más información que dar y pidiendo con premura sospechosa l’archivu de la solicitú.
Redaición InfoAsturies
This work is licensed under a Creative Commons Attribution 4.0 International License.
