“Si ves una bandera collorá na ventana`l vecín, nun pienses que se volvió de sópitu comunista, ye que tien fame” ye, fasta agora, la noticia con más visualizaciones dende l’aniciu d’InfoAsturies nel 2017

InfoAsturies algama un nueu recor de visites col so artículu del pasáu 14 de Marzu, nel que recoyíemos l’apaición de les primeres banderes colloraes nes ventanes d’Asturies, alertando de la presencia de llares ensin medios pa comer. L’artículu, tanto na so versión asturiana comu la so torna al español, suma ya 201.345 visites, pero la cifra sigui medrando a ca menutu.

Dende la so espublización, va namás tres dies la noticia espardióse pela rede prevocando, non solo esti emportante númberu de visites, sinon una reaición en cadena de persones qu’ufren el so sofitu a quien necesite ayuda pa superar esti empreslle y que tarán atentes a les señales nes ventanes del so barriu.

De magar esti artículu la noticia foi tamién recoyía nel HuffingtonPost, un de los periódicos dixitales de más sonadía a nivel estatal, que malque nun respetó la toponimia, si que caltuvo l’entítulu de la noticia, mencionando la fonte.

This work is licensed under a Creative Commons Attribution 4.0 International License.