• Portada
  • >
  • Sociedá/Llaboral
  • >
  • Los sindicatos asturianos denuncien que’l Gobiernu antepón los intereses económicos a la salú y porgüeyos de los ciudadanos

Los sindicatos asturianos denuncien que’l Gobiernu antepón los intereses económicos a la salú y porgüeyos de los ciudadanos

  • 3 Abril, 2020

Cuatro sindicatos asturianos piden al Gobiernu asturianu que protexa a toles persones y families que nun cunten con nenguna clas d’ingresu y denuncien la insuficiencia del sistema sanitariu asturianu por mor de los retayos y les privatizaciones

Los sindicatos alternativos d’Asturies (SUATEA, CSI, CGT Asturies y CNT) faen una valoración conxunta del desendolcu del coronaviru ya’l so impautu nel nuesu territoriu y alvierten de que la cris sanitaria ta prevocando una cris económica nueva “que quieren que vuelva cayer enriba la clas trabayaora”
Nel so manifiestu recueyen comu los porgüeyos económicos del sistema capitalista tan anteponiéndose a la salú y a los intereses de los trabayaores, y recalquen la emportancia de contestualizar esto nel marcu asturianu, yá de por sí castigáu pol desemplegu y la precariedá, onde miles de persones yá nun teníen primero d’esta crisis sanitaria drechu a prestaciones. “Tenemos miéu a qu’énte los miles de despidos que se tán produciendo estos díes, los espedientes de regulación, les mengües de xornada, etc., la situación pueda agravase hasta llímites estremos. A esto hai que sumar la existencia d’una economía sumida qu’afecta sobre manera a los sectores fuertemente feminizaos, en riesgu de quedar dafechu desamparaos. De la que vaigan pasando los díes de confinamientu, van dir saliendo a la lluz situaciones d’auténtica desesperación, onde’l famosu #quedaencasa va convertise en daqué inasumible.”
Comu camín pa iguar esta situación proponen la istauración d’una Renta Básica pa toles persones.

Nel ámbetu sanitariu, denuncien que, depués d’años de privatizaciones y retayos, la salú de les persones ta en manes d’un sistema sanitariu sobrepasáu ya insuficiente y acusen d’ello a les polítiques económiques neolliberales aplicaes polos gobiernos del Partíu Popular y el Partíu Socialista.

Esta incapacidá del sistema sanitariu p’afrontar una cris nun afeuta namás a la desatención de los enfermos, sinon a los trabayaores del seutor, que s’alcuentren ensin el material afayadizo, nin pa la so propia protección nin pa que puedan desenvolver l’actividá profesional, incumpliéndose sistemáticamente la Llei de Prevención de Riesgos Llaborales, y xenerando un círculu viciosu nel que les baxes de los compañeros enfermos o fallecios son cubiertos con xornaes llaborales maratonianes de los que queden, esponiéndose asina más a cayer contaxaos o esgotaos.

Dende estos cuatro sindicatos faen un llamamientu a tola clas obrera y demás sectores populares asturianos “pa que tea sollerte, de manera que, namás qu’esti confinamientu acabe, teamos en condiciones de salir a la cai a defender una salida social d’esta crisis nueva frente a les presiones de los poderes económicos y a los intereses del capital. Sollerte pa defender unos servicios públicos de calidá y pa desixir la vuelta a lo público de tolos sectores privatizaos. Sollerte frente a la xubida de la estrema drecha, que va querer beneficiase del mieu y de la inseguranza. Sollerte p’aneciar non solo en qu’otru sistema ye posible, sinón qu’otru sistema ye necesariu, y son les clases trabayadores les que tienen que construyilu”.

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies