La falta de previsión, los retayos de los años previos y perriba tou, la emigración forciada de trabayaores entitulaos nes caberes décades, faen abegoso cubrir la sópita demanda d’enfermeres y mélicos

La reclamación d’una UCI pal hospital mierénse vien de lloñe, ya nel 2018 se reclamaba la necesidá d’una Unidá de Curiaos Intensivos, por mor de l’alta tasa d’avieyamientu na fastera. Sicasí, esta pidición quedare desoyía y los enfermos graves continuaron teniendo que ser treslladaos al HUCA.

Agora, en plena cris del Coronavirus, la Conseyería Salú anuncia que los afeutaos de la cuenca’l Caudal y del Oriente asturianu sedrán atendios nel HVAB, pero los medios esistentes nesi hospital faen de fechu imposible cumplir esa planificación. Nun esiste UCI y, malque tean la intención d’iguar una Unidá en versión espres -pa ello reserven diez cames- los retayos de presonal de los años caberos faenlo imposible.

Falten pente 15 y 18 enfermeres pa poder poner en marcha una UCI ya’l Sindicatu d’Enfermería SATSE yá denuciare previamente la falta de personal, incluso pa cumplir coles llabores avezaes. Imposible plantegase aumentar a esi nivel l’actividá ensin contratar más plantiya. Pero malque ya se tan buscando enfermeres pa estos puestos, les bolses d’emplegu tan escosándose, tres del unvíu de presonal a les residencies del ERA.

Per otru lláu, Ispeción de Trabayu recoyó la denuncia del sindicatu Sicepa-Usipa pola ausencia de midies de seguranza, falta de mazcarines afayaices, guantes ya EPIs tantu pal presonal sanitariu como non sanitariu qu’operen nos hospitales.

Nuria Prendes