Dende Iniciativa pol Asturianu ufren cartelos n’asturianu con recomendaciones p’amenorgar los riesgos del andanciu. Los cartelos recueyen les normes xenerales con dellos diseños pa facelos llegar a familiares, collacios y compañeros de trabayu

Nos cartelos podemos alcontrar dende les recomendaciones más cencielles, comu la serie “llávate les manes” en delles versiones, dica istruciones más completes y detallaes de comu facer por apanguarl l’andanciu. La organización ufre esos cartelos con estremaos diseños n’asturianu pa utilizar en redes sociales o pa emprentar y colgar en llugares públicos como comunidaes de vecinos, tiendes, gasolineres…

“Creemos que cuánto más información tengamos ye meyor pa toos y toes y ye necesario tamién ufiertar esa información n’asturianu pa da-yos más visibilidá a eses normes y tamién normalidá al idioma” declaren, poniendo los cartelos a dimposición de quienes quieran emprentalos ya usalos, al traviés de les redes sociales d’Iniciativa pol Asturianu como Instagram (@iniciativaxast), Facebook (Iniciativa pol Asturianu), Twitter (@IniciativaxAst) y na páxina web de la organización.

Tamién ponen a dimposición de los asturianos un gif nel que se remembrando que ye normal sentise atristayáu, estresáu, confusu, asustáu o enfocicáu demientres una crís y la importancia de la comunicación con xente de conficanza nestos díes pa caltener la salú mental y l’ánimu.

Amás, quieren apurrir al pueblu asturianu un mensaxe d’animu: “Pa Iniciativa pol Asturianu ye importante cumplir eses normes y amás tamos seguros que vamos llograr xuntos y xuntes parar l’andanciu del coronavirus”.

This work is licensed under a Creative Commons Attribution 4.0 International License.