Nel 2.019 subió’l númberu de paraos por primera vegada nos caberos siete años, medrando’l paru de llarga duración ya’l númberu de llares con toles persones en paru, que s’avera al 10%
Acordies a los resultaos de la Encuesta de Población Activa recien apurrios pol INE, 59.300 asturianos busquen activamente emplegu nel país, ensin alcontralu, 1.600 más qu’a finales del 2018. Repunta especialmente la cifra de paraos de llarga y mui llarga duración, con 23.300 desemplegaos buscando trabayu dende va más de dos años y poro, ensin cobrar dala prestación. Cuasi una de cada diez families con persones n’edá de trabayar (el 9’06%) tien a tolos sos miembros en paru. Destaca la tasa de paru pente la mocedá, con un 30’55%.
Menos de la metá de la población n’edá llaboral, un escasu 44’10%, tien emplegu remuneráu, incluso col costante amenorgamientu d’asturianos n’esa franxa d’edá, 300 menos nun trimestre, 2.700 menos nel caberu añu.
No que cinca a la calidá del mercáu llaboral n’Asturies, nel cuartu trimestre de 2019 recuéyese una altísima temporalidá, que supera’l 25% de los contratos, ya’l 13’4% de tolos asalariaos trabayen a tiempu parcial.
L’únicu seutor que presenta bonos datos, con 9.700 emplegos más nun añu y 20.500 nuna década ye’l de servicios, precisamente destacáu pola baxa calidá de los sos trabayos. Nel estremu opuestu ta la industria, con 3.000 emplegos menos nun trimestre, perdiendo’l 30% del so volume total d’emplegu na cabera década.
Llucía F. Marqués
This work is licensed under a Creative Commons Attribution 4.0 International License.
