El 26 de Xineru de 2007 anunciábase la primer concesión de les llicencies de TDT n’Asturies: un total de 21 llocales y una autonómica, a les qu’habría de sumar otres siete d’ámbetu llocal reservaes pa les Cases de Conceyu de les demarcaciones nes que se dixebró’l territoriu nacional.  D’aquella falábase del seutor comu futurible “gran motor de la economía asturiana”.

Les grandes beneficiaes poles axudicaciones foron entós la Editorial Prensa Asturiana  – La Nueva España- (con siete llicencies, cubriendo toles demarcaciones), El Comercio (tres llicencies, toes na fastera cientral) y Canal 48 Occidente (cinco llicencies). La llicencia de la TDT de ámbetu autonómicu llevóla la Productora Asturiana de Televisión SA, empresa del grupu PRISA qu’abandonó la xestión de la TPA tres de descubrise tratos de favor, valoraos en 10 millones d’euros, baxo’l gobiernu d’Areces.

Una bones confirmáu el procesu de concesión, les empreses disponíen d’un plazu de nueve meses pa entamar a emitir. Sicasí, el gran negociu nun lo fue tantu: de toles llicencies llocales apurries d’aquella, delles nun llegaron enxamás a emitir, otres entardaron años en facelo -ensin que se yos retirare la llicencia por incumplimientu de plazu- y les más  fueron presllando, non sin anantes protagonizar ERES, concursos d’acreedores ya meses d’impagos a los trabayaores. Denguna d’elles apostó pola emisión dafechu n’asturianu, quedando relegáu l’idioma’l país a escasisimes apaiciones puntuales y guiños “graciosos” de dudosu bon gustu.

Agora surde esta nueva oportunidá cola futura concesión de 22 nuevos canales y cabe entrugase si el secretu pa que un d’estos canales trunfe ta, precisamente, nel usu del asturianu comu llingua única y nos contenios pensaos dende una perspeutiva asturiana.