• Portada
  • >
  • Economía
  • >
  • ¿Dalgún de los 22 nuevos canales TDT sedrá dafechu n’asturianu?

¿Dalgún de los 22 nuevos canales TDT sedrá dafechu n’asturianu?

  • 17 Xaneiro, 2020
La comunidá asturfalante crucia los deos ante l’anuncia del concursu p’algamar les nueves llicencies pa canales TDT ¿sedrá esta la oportunidá pa que surda la naguada televisión n’asturianu dafechu?
El Conseyu de gobiernu vien d’aprebar les bases regulaores pa sacar a concursu les llicencies de 22 canales llocales de TDT (Televisión Dixital Terrestre) que vendrán a sumase a les que ya tan operatives. Los canales emitirien nos conceyos de Xixón (2), Avilés (3), Cangas (2), Infiestu-Piloña (3), Llanes (3), L.luarca-Valdés (3), Mieres (3) y Uviéu (3).
El fechu de que les bases recueyan esplicitamente comu puntuable la emisión n’asturianu fae albidrar la posibilidá del ñacimientu de la naguada televisión n’asturianu, seique sedría namás d’ambetu llocal.
Otres cuestiones que puntuarán p’algamar la llicencia sedrá la promoción d’intereses hestóricos y culturales y los programes dirixios a la reciella y mocedá. Una bones espublizada la convocatoria, los interesaos dispondrán de 30 días para solicitar una llicencia y,darréu, abriráse un periodo de seis meses pa la resolución del concursu públicu.

El 26 de Xineru de 2007 anunciábase la primer concesión de les llicencies de TDT n’Asturies: un total de 21 llocales y una autonómica, a les qu’habría de sumar otres siete d’ámbetu llocal reservaes pa les Cases de Conceyu de les demarcaciones nes que se dixebró’l territoriu nacional.  D’aquella falábase del seutor comu futurible “gran motor de la economía asturiana”.

Les grandes beneficiaes poles axudicaciones foron entós la Editorial Prensa Asturiana  – La Nueva España- (con siete llicencies, cubriendo toles demarcaciones), El Comercio (tres llicencies, toes na fastera cientral) y Canal 48 Occidente (cinco llicencies). La llicencia de la TDT de ámbetu autonómicu llevóla la Productora Asturiana de Televisión SA, empresa del grupu PRISA qu’abandonó la xestión de la TPA tres de descubrise tratos de favor, valoraos en 10 millones d’euros, baxo’l gobiernu d’Areces.

Una bones confirmáu el procesu de concesión, les empreses disponíen d’un plazu de nueve meses pa entamar a emitir. Sicasí, el gran negociu nun lo fue tantu: de toles llicencies llocales apurries d’aquella, delles nun llegaron enxamás a emitir, otres entardaron años en facelo -ensin que se yos retirare la llicencia por incumplimientu de plazu- y les más  fueron presllando, non sin anantes protagonizar ERES, concursos d’acreedores ya meses d’impagos a los trabayaores. Denguna d’elles apostó pola emisión dafechu n’asturianu, quedando relegáu l’idioma’l país a escasisimes apaiciones puntuales y guiños “graciosos” de dudosu bon gustu.

Agora surde esta nueva oportunidá cola futura concesión de 22 nuevos canales y cabe entrugase si el secretu pa que un d’estos canales trunfe ta, precisamente, nel usu del asturianu comu llingua única y nos contenios pensaos dende una perspeutiva asturiana.

Nuria Prendes

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies