Nel casu d’Uviéu, ye’l sétimu díe consecutivu cola contaminación por benceno y micro partícules mui perriba de lo recomendao pola OMS
Seique tamos en temporada de lluvies, qu’agabiten a llimpiar l’aire, los datos oficiales qu’apurre’l “Principado” sobre la contaminación atmosférica y calidá del aire na so ueb, son alarmantes. Son cuatro los conceyos qu’ayeri recoyeron datos especialmente negativos, tantu en media comu pola presencia d’altos picos, comu los 10 µg/m3 de benceno deteutao a les 4 la mañana de güei n’Uviéu, con una media de 6 µg/m3 nes caberes 24 horas na estación de Trubía, frente a la recomendación de referencia de la Organización Mundial de la Salú (OMS) que ta en 1,7 µg/m3 de media anual, siendo motivu d’alerta pola llexisllación española el superar los 5 µg/m3- La Comisión Europea recomienda un valor de 0 pa esti contaminante polos sos efeutos canceríxenos.
Otros datos esmolecedores foron los deteutaos en Xixón, especialmente nel Lloredal, onde se deteutó a les 23 hores un descomanáu picu de 159 µg/m3 y presenta güei una media de 63 µg/m3 de Pm10, triplicando cuasi lo aceutable y sumando una a les 73 superaciones de media diaria nel añu, o el picu de 157 µg/m3 recoyíu na escondía estación de Llugones, que presenta güei una media de 52 µg/m3 de Pm10 en 24 hores. Menos llamativos, pero tamién dañinos pa la salú, son los datos de Ventanielles, con una media 25 µg/m3 de les Pm2,5 baxo la lluvia o los de La Felguera y Sama, con una media 27 µg/m3 de les Pm2,5 nes caberes 24 hores.
La O.M.S afita’l valor d’alerta con una media diaria de 50 µg/m3 pa les Pm10 y de 25 µg/m3 pa les Pm2,5.
La Coordinadora Ecoloxista d’Asturies denunció amás qu’estos datos son sesgaos ya inferiores a los reales, por vetar los datos recoyíos en continuo nes 45 estaciones público-privaes qu’apurren peores datos y faciendo público namás los resultaos de les estaciones intencionadamente allugaes nos emplazamientos menos contaminaos.
Redaición InfoAsturies
This work is licensed under a Creative Commons Attribution 4.0 International License.
