Güei, de magar les 12 el mediudíi y fasta la nueche, ta teniendo llugar una xornada de reflexón p’aldericar sobre les consecuencies de la sentencia del Procés pal conxuntu de los movimientos sociales y políticos

Asturies pol Drechu a Decidir convoca esta xornada na que se tomará comu puntu de partida el casu catalán pa falar de la necesidá de la llucha y de la solidaridá ente los pueblos comu camín pa garantizar les llibertaes civiles y democrátiques necesaries pa siguir desendolcando les distintes lluches vixentes n’Asturies y en tol estáu.

A les 12.30h, nel Salón d’Actos de Bioloxía, Marina Morante (activista social catalana) y Xavier Monge (ún de los abogaos defensores de les víctimes del 1O)  anicien esta xornada baxo l’entítulu de “Les llibertaes civiles y les implicaciones xurídiques de la sentencia del Procés” , Xunto a ellos, un par de compañeros d’Asturies: el músicu Nacho Vegas, persona solidaria con estremaes lluches como les de la PAH y que tamién vien de significase a favor del drechu a decidir y la democracia frente a les porres y les sentencies y la compañera Silvia Salamanca, activista de la plataforma “Asturies pol Drechu a Decidir”.

De tardi, nel Centru Social de La Lila d’Uviéu les actividaes siguin con “Voces solidaries col drechu a decidir, faciendo palanca pa la tresformación social”,  na qu’intervendrán el profesor de la UNED y miembru de “Madrileños por el Derecho a Decidir” Jaime Pastor,  les trabayadores de la Plataforma SAD Asturies y los dos compañeros catalanes Marina Morante y Xavier Monge. L’alderique tará moderáu por Iyán Glez. de la plataforma organizadora.

Pa finar, les xornades treslladaránse al Llar La Llegra pa siguir col alderique nun formatu más cercanu y con una espicha que valga pa dar el pieslle a les xornaes.

Redaición InfoAsturies

This work is licensed under a Creative Commons Attribution 4.0 International License.