David Cabal, l’home tres de “El tiempu n’Asturies”

  • 19 Payares, 2019

Ayeri denunciábase un nuevu ataque asturfóbicu, nesti casu contra’l nuesu collaborador meteorologu, David Cabal Menéndez, creador de la páxina “El tiempu n’Asturies” y del nuesu Parte Metereolóxicu diariu. Al paecer, esta nun ye la primer vegada que quieren facelu camudar de llingua

– ¿Dende cuando te dediques a la meteoroloxía?

Tengo 44 años y dende que tengo usu de razón soi un apasionáu de la meteoroloxía, participaba en foros de meteoroloxía y en dellos asturianos, onde deprendí munches coses, pero tuve dalgún roce por facelo n’Asturianu.

¿Asina qu’esta nun ye la primer vegada que quieren forciate a facer el to llabor n’español?

Non, nun de los foros -que prefiero nun mencionar porque sigui allí tamién mui bona xente que me respaldó- los alministradores decidieron aplicar un correutor que traducía delles pallabres al castellán, pente paréntesis, al par de la pallabra n’asturianu, colo que quedaba un testu perabegosu d’entender, amás de facerme cometer faltes d’ortografía porque nun furrulaba nada bien.

Quexéme varies vegaes porque paecíame una falta de respetu tremenda pa col asturianu y nun me ficieron dengún casu.

-¿Cuando decidiste entamar la páxina “El tiempu n’Asturies”

Cuando vi que nun se respetaba l’asturianu nos grupos que taba decidí falar de lo que me prestaba a traviés de les redes sociales, primeru nel mio muru y en grupos de whasap y como vi qu’interesaba creé la páxina del Tiempu n’Asturies, si nun recuerdu mal fae unos cuatro años y equí nos atopamos.

– Va pa tres años que yes collaboraor d’InfoAsturies col Parte  Metereolóxicu diariu, ¿Collabores con daquién más?

De momentu solo colaboro con vosotros, tuve un tiempu collaborando con una emisora de radio, pero dexo de dar los partes porque tuve una temporada ensin espublizar

– Pa finar, la entruga que te fadrán los que nun son asturfalantes ¿Porqué t’emperres en facelo n’asturianu?

Como esperiencia dar el tiempu a diario y n’asturianu ye una mui bona forma de normalizar el so usu, ye un tema qu’interesa a la mayoría de la xente y munchos de los mios siguidores ye’l primer y únicu contauto escritu que tienen con pa él y pa mi ye lo más gratificante de too. Por ciertu, yo l’asturianu deprendilu escuchando Radio Sele.

Pero sobre tou por que quiero y por que teo drechu a ello; comu dixe nes redes, si dempués de más de 5 años espublizando’l tiempu n’asturianu, a un fascista paez-y mui mal que lo faiga, yo quédome coles cientos de persones que me seguís y os presta lo que faigo. Non al fascismu, puxa la xente bona!.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies