Bonos díes, bona xente.

Alborecemos con escasa nubosidá y con unes temperatures que tan alrodiu de los 14ºC, rexistrándose nel puirtu Payares 10,6ºC.

Güei vamos tener un día mui prestosu y afayaizu con poca nubosidá y sol asgaya, amás les temperatures van tar ente los 20-25ºC de másima polo que l’ambiente nun va tar chornosu. L’aire sele ya variable con dalgo de nordés pela costa.

Mañana vuelve la escuridá, primeru na metá norte d’Asturies, llibrándose les zones altes de la cordelera y dellos valles del surocidente, anque per estes zones tamién llegarán les nubes durante la tarde cuando podrán dase dellos orpinos y orbayos sobre too nel llitoral y fastera central asturiana. Les temperatures másimes en descensu y l’aire sele con predominiu del norte nel llanu y de la componente suroeste na cordelera.

Durante’l riscar y alborada del domingu les precipitaciones dirán a más y afeutarán a más zones, anque sedrán febles polo xeneral, con un descensu de les temperatures que fadrá que surda de nuevu, la nive nes cumes más altes, perriba de los 2000m pela cordelera y Picos d’Europa. Durante’l día van abrise dellos claros y saldrá’l sol pero l’ambiente sedrá dalgo desagradable pol vientu que pue soplar moderáu de componente noroeste cola posibilidá de qu’arrastre dalguna gotera y conteniendo les temperatures másimes que malpenes algamarán los 20ºC.

Nel entamu la selmana seguirá dalgo inestable con dalgún xarabatu feble ya dispersu pero con tendencia a meyorar a partir del miércoles, pero esto yá lu diremos viendo.