Xixón acueye’l 9 de payares una nueva grabación d’esti ciclu de conciertos en formatu íntimu, grabaos y emitíos per Internet, padrocináu por Xixón Turismu dientro de les aiciones empobinaes a esparder la cultura llocal, una de les desixencies del sellu Biosphere como destín turísticu caltenible
El 9 de Payares torna Amosando, el ciclu de presentaciones de discos entamáu por musicasturiana.com con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa que llegue a persones de tol mundu.
Tres el pasu per Amosando de L-R, Xaime Martínez, Ún de Grao y D’Urria, lléga-yos la vez a dos de les muyeres más reconocíes de la música asturiana, Anabel Santiago y Eva Tejedor. Coles sos actuaciones van pesllar el sábadu 9 de payares la edición 2019 d’esti ciclu de presentaciones de discos entamáu por musicasturiana.com, con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa que llegue a persones de tol mundu.
Anabel Santiago va presentar ‘Y_Andá‘, un discu -l’ochavu de la so carrera- onde esta renovadora de la canción asturiana vuelve a anovar y lleva la so propuesta al ámbetu de la música electrónica y del pop, calteniendo tamién los raigaños de la tradición sonora asturiana. Pela so parte, Eva Tejedor & Les Pandereteres van presentar el so primer álbum ‘L’Entamu‘. Nel so nuevu proyectu, esta veterana artista folk entemez temes de composición propia xunto a reelaboraciones de pieces tradicionales, dando como resultáu unos cantares enllenos de calidá y qu’abren nuevos caminos sonoros dientro de la música protagonizada pola pandereta y otros instrumentos tradicionales de percusión.
La ciudá de Xixón va acoyer esta grabación a les 18.30h d’esti sábadu 9. La entrada ye de baldre pero ta llendada a les 20 persones que ganen una invitación participando nun sorteu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y la productora Goxe Producciones.
Conciertu Ún de Grao
Amás de la convocatoria d’esti conciertu/grabación, musicasturiana.com publicó apocayá’l videu del conciertu completu y de la entrevista con Ún de Grao presentando ‘Pelo Segao‘, trabayu que lleva a la tonada hacia soníos propios del rock, del jazz o de la bossa nova. Los videos de D’Urria -los otros protagonistes de l’anterior edición d’Amosando- presentando ‘En Ca Pla‘ van publicase a mediaos d’esti mes.
This work is licensed under a Creative Commons Attribution 4.0 International License.
