Dientro la so campaña pa que se-y retiren los títulos de fiu predileutu de la Villa de Xixón y la Medaya d’Oru d’Asturies, otorgaos a títulu póstumu a Vicente Alberto Álvarez Areces (1943-2019, Andecha Astur vien d’entamar una campaña en change.org
Na campaña de Change.org, que recoyó más d’un cientu de robles nes primeres hores, entamen presentando’l currículum políticu d’Areces dientro’l PSOE (12 años alcalde de Xixón, 12 años presidente d’Asturies y senaor depués en Madrí), pasando a detallar comu na reciente sentencia del Tribunal Supremu Español sobre fechos conocíos comu casu Riopedre-PSOE o casu Marea, qu’afeutaron fonda y masivamente a l’alministración pública asturiana nos años en que Vicente Alberto Álvarez Areces foi presidente’l Gobiernu d’Asturies, na que da a entender que la corrución foi xeneralizada y endémica demientres la so presidencia.
El Tribunal Supremu confirmó los delitos de prevaricación, malversación, cofechu y falsedá de los yá condergaos pola Audiencia Provincial d’Asturies, afitando pa ellos multes y penes de varios años de prisión. Ún de los condergaos ye José Luis Iglesias Riopedre, naquel tiempu Conseyeru d’Educación del Gobiernu d’Álvarez Areces, y otra María Jesús Otero, entós Direutora Xeneral d’Educación, colos qu’amás Areces caltenía un contautu personal mui cercanu.
De los fechos reconocíos por sentencia’l Tribunal Supremu, derívase la inescusable responsabilidá política que nestos fechos tuvo l’entós presidente del Gobiernu d’Asturies, Vicente Alberto Álvarez Areces, polo qu’Andecha Astur anició una campaña pa desixir la revocación de la Medalla d’Oru d’Asturies y el títulu de Fíu Predileutu de la Villa Xixón, otorgaos dambos a Vicente Alberto Álvarez Areces, daqué que ya desixó per escrito al “Principado” y al conceyu de Xixón.
Na so campaña en Change.org pidin tamién que nun se conceda indultu dalu a los condergaos pola Audiencia Provincial d’Asturies y pol Tribunal Supremu nel conocíu comu casu Riopedre-PSOE o casu Marea, condergaos por prevaricación, malversación, cofechu y falsedá, asegurándose que cumplan la totalidá de la so pena de cárcele.
Consideren tamién una cuestión de xusticia pa col pueblu asturianu que los condergaos se vean forciaos a la devolución íntegra de tolos millones d’euros que malversaron y/o de los que s’apropiaron.
Redaición InfoAsturies
This work is licensed under a Creative Commons Attribution 4.0 International License.
