Les menacies recaen sobre un simpatizante d’Andecha Astur, afincáu na comunidá de Madrí, que colgó un cartelu en defensa los presos políticos nel correor de la casa que comparte con una moza catalana

Jonatan García, asturianu desplazáu a Madrí por cuestiones llaborales -trabaya comu interín na sanidá pública- y la so moza, de Barcelona, viven n’Olmeda de las Fuentes, un pueblu madrileñu de 300 moraores, al sureste de la comunidá de Madrí.

Nel so correor tienen puesto, dende’l 18 d’Ochobre, un cartelín que diz “Llibertat Presos Politics” que foi, al paecer, el desencadenante de les menacies.

Ayeri, namás cuatro díes depués d’esconlingalu, recibieron en so casa una nota anónima na que se llee, testualmente “¿Porque no te vas  Cataluña y dejas de dar pol culo. O quitas el cartel o te quemamos la casa. Esto es España.” no que paez a primer vista la robla trae “Subnormal”, Jonatan supón que ye un insultu, non una identificación del autor de la nota.

Elli define l’ambiente del pueblu, en xeneral, comu bonu, acoyeor y “más bien d’izquierdes” polo que nun considera que l’anónimu seya representativu de la comunidá. De fechu, dalgún vecín ya-y amosó la so solidaridá y la so dimposición p’aidalu a descubrir al responsable del anónimu.

Nun piensen retirar el cartel, cuenten siguir exerciendo la so llibertá d’espresión y van interponer una denuncia oficial del casu; sicasí, nun descarta siguir recibiendo más agresiones.

Llucía F. Marqués

This work is licensed under a Creative Commons Attribution 4.0 International License.