La Comisión Europea tien tres meses pa retrucar a les entrugues presentaes por Agora Repúbliques, coallición de la que forma parte Andecha Astur

Nun ye la primer vegada qu’Andecha Astur defende los drechos llingüísticos na Xunión Europea: la so pertenencia a la coallición Agora Repúbliques permitió a la organización nacionaliega tar presente en Bruseles en delles ocasiones, que siempres aprofitó pa denunciar la represión llingüística n’Asturies. Nesti casu presentarán a la Comisión Europea un escritu nel que se-y pidi que se posicione respeutu a lo asocedío’l pasáu 1 d’Ochobre nel Parllamentu Asturiano y respeutu a la discriminación continua que los asturianos carecen pol usu de la so llingua.

Dende esti partíu consideren inutil esperar amparu del gobiernu español nin respeutu del “Principado”, polo que deciden llevar la cuestión de la discriminación dica la Comisión Europea, a la que plantegarán tres entrugues, desixendo el so posicionamientu ante esti casu concretu, ante la discriminación llingüística xeneralizada que se carez n’Asturies y pidiendo información sobro les midies concretes que se pondrán en marcha dende la Comisión pa garantizar los drechos llingüísticos de la ciudadanía de la Xunión y facer cumplir la Carta de los Drechos Fundamentales de la X.E., que nel so artículu 21 afita que se prohibe “toa discriminación, y en particular la exercía por razón de llingua”. 

L’argumentación apurrida polos lletraos de la cámara autonómica ye discriminatoria, allegando estos que ye permisible la interrupción  de la intervención del discursu de Berta Piñán por usar la so llingua puesto que “los miembros del gobiernu nun tienen drechu a usar la llingua propia, cosa que si pueden facer les diputaes y diputaos”

La imposición de la llingua española a Piñán contradiz tamién a la resolución del Parllamentu Européu sobro les llingües europees menaciaes d’esapaición y la diversidá llingüística, asina comu la Carta Europea de Llingües Rexonales y Minoritaries. España ya foi istada en so momentu a cumplir esta cabera al traviés d’una recomendación del Comité de Ministros del Conseyu d’Europa

A la fin, Andecha Astur quier remebrar que “esta situación d’anormalidá democrática que carecemos n’Asturies tien la so causa ne imposición dende Madrid d’un estautu y una istitución –el “Principado”- ensin permitir votalu a los asturianos y nel qu’ensiquiera se reconoz la oficialidá de la nuesa llingua, situación de la que ye direutamente responsable’l PSOE n’Asturies”.

Nuria Prendes

This work is licensed under a Creative Commons Attribution 4.0 International License.