L’asturiana ye una de les flotes más ecolóxiques nel so furrulamientu d’Europa, siendo de les poques que siguen un sistema de pesca caltenible que respuende al marcu de futuru que se plantega a nivel global y na X.E, pero el relevu xeneracional ta en pelligru poles dificultaes peles que pasa el seutor: el númberu d’embarcaciones dedicaes a la pesca n’Asturies cayó en más del 50% na cabera década, siendo asturianos pocu más de 250 de los más de 4.800 barcos de la flota cantábrica.

«Creemos que lleven cincu años riéndose de nos y tamos fartucos» declararon los pescaores, que miren con desconfianza les promeses de Calvo, qu’aseguró que defendería les cuotes pero que ya alvirtió de que les cuestiones que cinquen a esta problemática «nun se deciden n’Asturies», incidiendo na dificultá que la interinidá del gobiernu d’España implica pa cualisquier negociación. Lo que si ufrió a cambiu foi «dar más valor a los productos descargaos y envasaos a traviés de la potenciación de la marca Alimentos del Paradisu», opción que nun convence a los que viven de la pesca, que ya avisaron: si nun hai meyores cuotes, habrá movilizaciones.

Llucía F. Marqués