La Federación Asturiana Memoria y república (Famyr) ve nello una seña de la continuidá de la llinia de gobiernu pente Javier Fernández y Adrián Barbón

El Gobiernu asturianu tornó a refugar la petición, avalada por más de 45 asociaciones y más de 1.200 persones a títulu individual, de que se concediere la Medaya d’Oru d’Asturies a los guerrilleros antifacistes asturianos Vicente García Riestra, Felipe Matarranz, Comandante Robert y Cristino García. Por contra, el 14 d’agostu decidióse otorgar esta distinción a títulu póstumu a un de los principales responsables del desaniciu del texíu socioeconómicu asturianu, reconocíu cómpliz de la corrupción del SOMA-PSOE, l’espresidente Vicente Álvarez Areces.

Poro, dende FAMYR señalen que’l nuevu presidente asturianu, Adrián Barbón “nun entardó en dexar nidio que les espeutatives de francer cola llínia siguía pol so antecesor, Javier Fernández, yeren una falacia”. La Federación Asturiana Memoria y República solicitare una entrevista personal con Barbón, pero siguen esperando pola rempuesta.

Ye la tercer vegada que se deniega esta distinción, depués de que l’executivu de Javier Fernández la refugare; con ello los guerrilleros continuen cargando cola conderga oficial de “bandoleros” que recibieren en vida de Franco, ya ensin ser reconocios nel so llar. Sicasí, en Francia si se yos reconoz comu héroes y comu tales se yos honra pola so contribución a la derrota del nazismu.

Redaición InfoAsturies