• Portada
  • >
  • Asturies
  • >
  • Andecha Astur propón a la Xunta Xeneral d’Asturies la cellebración institucional del 24 d’Agostu en reconocimientu del Conseyu Soberanu d’Asturies y Llión

Andecha Astur propón a la Xunta Xeneral d’Asturies la cellebración institucional del 24 d’Agostu en reconocimientu del Conseyu Soberanu d’Asturies y Llión

  • 23 Agostu, 2019

La organización nacionaliega, que tien convocáu un actu en Tarna pa la xornada del 24, denuncia’l xeneral escaezu y/o utilización de la historia asturiana y pidi a la Xunta Xeneral y a tolos grupos parlamentarios que la componen un reconocimientu esplícitu de la emportancia de los fechos asocedios na nuechi del 24 d’agostu de 1937

Va 82 años de la costitución del Conseyu Soberanu d’Asturies y Lleón, un ente independiente de fechu de la república española, qu’asumió plena xurisdición y responsabilidá nel gobiernu civil y militar de los sos territorios, costituyéndose nuna República Asturiana, la cabera istitución democráticamente escoyía pol Pueblu Asturianu.

La efemérides, como munches otres venceyaes a  momentos clave de la hestoria d’Asturies, pasará desapercibía a nivel istitucional, siendo l’homenaxe qu’Andecha Astur cellebra ca añu en Tarna l’únicu reconocimientu a los héroes que llantaron cara al facismu en nome del Pueblu Asturianu.

Pa A.A. ye urxente finar con esti silenciu istitucional nel que se tien somorguiáu el Conseyu Soberanu y la utilización interesada de la figura del so presidente, Belarmino Tomás.

Nesi sen proponen a la Xunta Xeneral, por alcuerdu o votación de los grupos parllamentarios que la componen, declare de magar l’añu viniente la fecha del 24 d’agostu comu fecha de necesaria cellebración institucional. De ser aceutada la so propuesta -qu’entá nun recibió rempuesta, nin afirmativa nin negativa- la Xunta Xeneral convocaría una sesión estraordinaria del Plenu nel que se fadría llectura d’un testu de remembranza de la declaración soberana d’Asturies. Proponen tamién que nesa mesma fecha el mobiliariu que formó parte del despachu de Belarmino Tomás seya treslladáu a la Xunta Xeneral, declarándose esa xornada comu de puertes abiertes pa que la ciudadanía asturiana pueda visitar el despachu del presidente y l’edificiu de lo que debería ser l’ente representante d’una Asturies Soberana.

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies