El sábadu 17 ya’l domingu 18 d’Agostu tendrá llugar en El Campu (Casu) un homenaxe a los represaliaos del franquismu nel conceyu

De magar l’añu 2014 un monolitu con una placa na entrada la capital del conceyu casín recueye la memoria de los represaliaos del franquismu. Un añu anantes entamaren les Xornaes d’Alcordanza y Homenaxe qu’esti añu aporten a la so sétima edición faciendo por afitar la memoria de los nuesos heroes.

Esti añu les xornaes entamen el sábadu a les 7 la tardi cola charra “L’alcordanza debuxada” a cargu de los autores de los cómics de temática hestórica Ruma Barbero, autor de “Gaspar a tiempu completu” y  Alberto Vazquez, autor de “Los llazos colloraos”.

El 18 a les 13:00 tendrá llugar na Ponte Romana, al par de la que s’alcuentra’l monolitu na so memoria,  l’Actu d’Homenaxe a les víctimes del franquismu y lluchaores antifacistes del conceyu Casu, cola tradicional ufierta de claveles colloraos. A les 18:30, tres de la Xinta Popular, tendrá llugar un conciertu a cargu de Salvador Amor (Rojo y cancionero), la Re-vuelta (Adolfo y Ramón) y May.

Tolos actos cuntarán col acompangamientu musical de la Banda Gaites Turruxón.

Nuria Prendes

This work is licensed under a Creative Commons Attribution 4.0 International License.