El nuevu gobiernu tampocu nun cuntará con una Conseyería esclusiva de Mediu Ambiente, dependiendo les cuestiones rellatives a esti del organismu estatal correspondiente y de la Conseyería d’Infracadarmes

Nun dexa de ser contradictorio que’l d’Asturies, el “Paradisu Natural” menaciáu nel que el “Principado” basa tola so política turística, seya de los pocos gobiernos estatales nos que’l mediu ambiente nun tien el másimu rangu, quedando relegáu a una Viceconseyería ensin pesu pa negociar, lo que dexa a la política mediuambiental a mercé d’intereses urbanísticos, industriales y turísticos, comu vien ocurriendo nos caberos años.

La Coordinadora Ecoloxista alcuentra “inasumible” que s’englobe una estaya de tanta relevancia n’Asturies, comu ye la de Mediu Ambiente, dientro d’una macro conseyería d’Infracadarmes, tamién saturada. Arriendes d’ello, Infracadarmes y Mediu Ambiente son precisamente dos cuestiones antagóniques ya enfrentaes “habrá costantes diferencies ya enfrentamientos nel día a día, nos que la que más perdería sedría’l Mediu Ambiente, comu se ve nos caberos años cola nefasta xestión de los conseyeros del ramu y les abondes agresiones ambientales cometies pol “Principado” en nome de les infracadarmes”.

Reconocen, sicasí, que la esistencia de la Conseyería de Mediu Ambiente por si sola nun garantiza una bona xestión ambiental, pero ven que ye un requisitu imprescindible pa plantar cara a los retos que tien qu’afrontar Asturies: contaminación d’aire y agües, colonización d’ocalitos, cambeu de modelu enerxéticu, xestión de residuos, perda de biodiversidá, quemes forestales, furtivismu, cambeu climáticu…

Redaición InfoAsturies

This work is licensed under a Creative Commons Attribution 4.0 International License.