Cuando la proteición social falla y l’alministración se desentiende de los que más lo necesiten, namás la solidaridá pente la xente puede encaminar la situación

Belén Giménez, ma de cuatro fios ya económicamente dependiente del salariu social, coló ayeri de la que fore la so casa, cerca’l Palaciu los Esportes d’Uviéu, unes hores anantes de la marcada pa ser espulsada d’ella pola fuercia: convencía de que nun habría solución prefirió nun facer pasar a la so familia pol mal tragu de salir a rastres.

La solución propuesta por servicios sociales consistió en recomendayos “que guetaren una nueva vivienda nel mercáu llibre” con una ayuda complementaria pal pagu l’alquiler, ensin aparase a valorar la dificultá d’alcontrar arrendaores dimpuestos a alquilar a persones dependientes del salariu social, más entá con tantes cargues familiares y con antecedentes de desfiuciu.

Namás la solidaridá d’un vecín de Ventanielles que casualmente conoció’l casu pela prensa torga que los prósimos meses durman na cai. El propietariu de la vivienda qu’utilizarán esti branu pasa esta temporada fuera de la ciodá, polo qu’estos tres meses tendrán onde quedar, pero el problema nun ta iguáu, namás aplazáu.

Nuria Prendes

This work is licensed under a Creative Commons Attribution 4.0 International License.