Dende esta selmana, el doblaxe n’asturianu del llargumetraxe clásicu El rostru impenetrable, orixinal torna del entítulu n’inglés One-Eyed Jacks,  pue vese n’abiertu en Vimeo fechu pola Escuela de Doblaxe d’Asturies,  centru venceyáu a la productora Wadjet Media

Esti filme ye un western de 1961 fechu nos Estaos Xunios d’América, dirigida y protagonizada por Marlon Brando, a quien también acompangó  l’actor Karl Malden. Inicialmente, Stanley Kubrick entamó a dirixilu, pero tres d’esos meses foi dispidíu por descartar a Marlon Brando, quien terminó dirixendo la película. L’actriz Rosita Moreno collaboró como consultora nel tema.

Dobláu al asturianu por Gonzali Producciones (anguañu Wadjet Media) estrenólu la Televisión del Principáu d’Asturies nuna emisión del 27 d’avientu de 2013, siendo la primera de les películes doblaes qu’emitiera la canal. Illán Gonzali dirixó y produció’l versionáu, que tuvo un repartu de más de venti voces. D’ente los actores y actrices de doblaxe que participaren nesti trabayu destaquen Carlos Novoa (Marlon Brando), José Antonio Lobato (Karl Malden), Ana Díaz Morán (Pina Pellicer), Andrés Presumido (Slim Pickens), Antón González (Timothy Carey) o’l va poco fallecíu Eladio Sánchez (Ray Teal).

Gran parte de la crítica consideró qu’El rostru impenetrable yera un megalómanu vanity film y un exerciciu narcisista del so direutor-actor. A la contra, la so receición n’Europa foi perbona, y asina en Xunetu de 1961 recibió la Concha d’Oru nel Festival Internacional de Cine de San Sebastián.

El xixonés Illán Gonzali, per aciu la so productora, tien doblao yá amás de “El rostru impenetrable” un bon númberu de títulos n’asturianu, sía pal mercáu videográficu como “La nueche de los muertos vivientes”, “El tercer home”, “McLintock”, “Los viaxes de Gulliver”, “Diez negrinos “y series d’animación “Popeye”, “Supermán” y “El Picatueru (Woody Woodpecker)”, o sía pa la so emisión na TPA como les películes “Harry el suciu”, “Orixe”, “Ocean’s Eleven” o “Sherlock Holmes:Xuegu de Solombres”.

Enllaz direutu al vidiu: https://vimeo.com/337300457

Redaición InfoAsturies

This work is licensed under a Creative Commons Attribution 4.0 International License.