Marta Fernández y Xel Díaz aprofitaron la entrega del premiu pa reclamar atención pal mediu rural asturianu
L’Asociación Pláganu vien d’entregar el Premiu al Meyor Quesu Asturianu a la quesería Ca’ Sanchu d’Ambás, una empresa familiar de tres xeneraciones fieles a la meyor tradición quesera.
Na entrega del galardón Marta Fernández agradeció’l reconocimientu y aprofitó pa reclamar la meyora de les condiciones y los servicios na fastera rural asturiana “desendolcamos el trabayu nuna zona preciosa, pero hostil, nel mediu rural asturianu. Poro proponemos que faigan daqué pol mediu rural, que ye’l sustentu d’esti país”. Recordó tamién que la llei desixe lo mesmo a les grandes empreses que a les piqueñes y artesanales, lo que fae entá más abegoso salir alantre y más valorable’l so enfotu y la so trayeutoria.
En Ca’Sanchu faise quesu d’afuega’l pitu, tienro, con sal, ensin sal, semicuraos, curaos, blancos o roxos, atroncaos o de trapu… un total d’unos 60.000 quesos al añu que producen y ellos mesmos reparten, polo que nun se toparán en grandes superficies, sinon en comercios de prosimidá.
Llucía F. Marqués
This work is licensed under a Creative Commons Attribution 4.0 International License.
